Poorskereerpat suanniarneq aallartissaaq

Aalisarnermut, Piniarnermut Nunalerinermullu Naalakkersuisoqarfiup naatsorsuutigaa Nanortallip eqqaani nipisanniarneq apriilip aallartinnerani aallartissinnaasoq.

Nipisanniarneq qaqugorpiaq aallartissanersoq poorskip kingorna naalakkersuisoqarfiup tusagassiorfinnut nalunaarutikkut nalunaarutigissavaa, Namminersorlutik Oqartussat paasissutissiipput.

Akuersissutit siulliit 200-t

Tamatuma saniatigut naalakkersuisoqarfimmi aalisarnermut immikkoortoqarfiup oqaatigaa akuersissutit siulliit 200-t tunniunneqareersimasut.

Aalisarnermut immikkoortoqarfiup siulittuutigaa ingerlatsivinni avannarpasinnerusuni nipisanniarneq kujataani ingerlatsivinnit kingusinnerusukkut aallartissasoq.

Taamaasilluni naalakkersuisoqarfiup naatsorsuutigaa Qeqeqrtarsuup Tunuani nipisanniarneq aatsaat apriilip qiteqqunnerani, sap. ak. 16-imi, aallartissasoq.

2015-imi nipisanniarnissamut akuersissutit tamarmiusut 400-t sinneqarput.

Ukioq siulleq

2015-imi aalisarnermi malittarisassat nutaat atorneqaqqaarput. Kitaata sineriaa maanna ingerlatsivinnut arfineq-marlunut avinneqarsimavoq. Ingerlatsiviit tamarmik pisassinneqarput, aalisarnerlu sivisunerpaamik ullunik 47-nik sivisussuseqassaaq.

Aalisarneq unisinneqassaaq aalisarnerup aallartinneranit kingusinnerpaamik ullut 47-t qaangiuttut. Ingerlatsivimmilu pisassat ullut 47-t suli qaangiutinngitsut nunguppata aalisarneq aamma unitsinneqassaaq.

Sumiiffinni isumaqatigiissutigissavaat

Sumiiffinni aalisartut peqatigiiffiisa tunitsiviillu isumaqatigiissutigissavaat ingerlatsivinni ataasiakkaani aalisarneq qaqugu aallartissanersoq kissaatiginerlugu.