Pompeop Pituffimmut tunngatillugu isumaqatigiissutit iliuuseqarfigineqarnissaat isumaqatigaa
Naalakkersuisup Ane Lone Baggerip, nunanut allanut ministerip Jeppe Kofodip USA-llu nunanut allanut ministeriata Mike Pompeop ataatsimeeqatigiinnerat naammassineqaqqammerpoq
Mike Pompeomik ataatsimeeqateqarneq naammassineqaqqammerpoq, Ane Lone Baggerillu Pituffimmi kiffartuussinissamut isumaqatigiissutit oqaluuserisassanut ilaatissimavai.
- Erseqqissaatigaara, oqaaserineqartut malillugit iliuuseqartoqassasoq, taanna Sermitsiaq.AG-mut oqarpoq.
- Mike Pompeop iliuuseqartoqarnissaa isumaqatigivaa. Tamannali pissanersoq piffissap kisimi takutikkumaarpaa.
Ataatsimeeqatigiinneq nalunaaquttap ataatsip affaanik sivisutigisimavoq, Ane Lone Baggerillu ataatsimeeqatigiinneq pitsaasututu ammasumillu ingerlanneqartutut oqaatigaa.
- Pompeomut erseqqissaassutigaarput, Pituffimmiinneq Kalaallit Nunaannut iluaqutaassasoq, taanna oqarpoq.
Ane Lone Baggerip oqaluuserititaa alla tassaavoq, USA-p Kalaallit Nunaanni timmisartoqarfinnut, inuinnaat sakkutuullu atortagassaannut aningaasaliissuteqarnissamik siunnerfeqarluni nalunaaruteqarsimanera.
- Attaveqaatit aningaasaliiffigineqarnissaannut sunik kissaateqarnerput oqaatigaarput. Martsip qaammataanili kissaatigisavut USA-mut nalunaarutigisimavavut. Maanna Amerikamiut qanoq aningaasaliissuteqassanerlutik aalajangissavaat.
Aamma nalinginnaasumik suleqatigiinnerup nukittorsarneqarnissaa Nuummilu aallartitaqarfimmik ammaanissaq oqaluuserineqarput.
Mike Pompeo upernaaq Nuummut tikeraartussaagaluarpoq, ataatsimeeqatigiinnissarli Iranimut tunngatillugu ajornartorsiuteqartoqaleriasaarnera pissutigalugu unitsiinnarneqarluni.
Nuummukarsinnaanerali suli neriuutissaqarpoq.
- Aammaarluta Kalaallit Nunaannut qaaqquarput, taannalu akivoq piffissami qaninnerpaami tikeraarnissani sulissutigalugu.
- Issittoq Atlantikullu Avannaa nunarsuarmi inissisimanertik pissutigalugu pingaaruteqaleriartuinnarput. Piffissami matumani pingasuulluta ataatsimeeqatigiinnerput ajunngilluinnarpoq, Ane Lone Bagger ataatsimeeqatigiinnissaq sioqqutilaallugu tweet aqqutigalugu allappoq.
Jeppe Kofod taamatut nipilimmik aamma allagaqarsimavoq.