Politi: Ukkusissat eqqaani ujaasineq unitsinneqarpoq

Inuk Ukkusissat eqqaani umiatsiaminit tallimanngormat ualinerani nakkartoq pillugu ujaarineq, politiinit taamaatinneqarpoq.

Inuk Ukkusissat ungasinngisaanni sermeq iigartartumit nakkaaffigitilluni umiatsiaminit nakkarsimasoq, politiinit maanna ujaarineqarunnaarpoq.

Takunnittoq Aasiaat Radioa aqqutigalugu maydayimik tallimanngormat nal. 17.16 kalerrisaarivoq. Takunnittup takusimavaa umiatsiaq iluliaminersuarnit nakkaaffigineqartoq, inullu umiatsiamit imaanut nakkartoq.

- Ujaarinissaanut unammillerneqangaatsiarsimavugut. Silap taarsiartulereernra pissutigalugu qulimiguulik ujaasitissallugu aallartiaarsinnaasimanngilarput. Taamaattumik pujortuleeraq aalisariut umiatsiallu qulit ujaaseqataapput, soorlu aamma Uummannamiit politiit marluk umiatsiarlutik ujaaseqataasut, Kalaallit Nunaata Politiivisa pigaartuanni pisortaq, Julie Senderovitz Bendtsen Sermitsiaq.AG-mut oqaluttuarpoq.

Arfininngornermi sila qaammarmat qulimiguulik aatsaat ujaaseqataalersinnaasimavoq.

Ajunaartoq nassaarineqanngilaq

Pigaartut pisortaat nassuiaavoq ujaarisoqarnerani ajunaartoq nassaarineqarsimanngitsoq. Ujaasineq politiinit ippassaq ualikkut unitsinneqarpoq, ilaqutaasullu kalerrinneqarsimallutik.

- Ujaasinermi peqataasut tamaasa qujaffigerusuppagut. Erseqqissarusupparpullu ujaaseqataasimasut arlaat aliasukkuni tujormissuteqaruniluunniit, peqqinnissaqarfimmut qaqugukkulluunniit saaffiginnissinnaammat, Julie Senderovitz Bendtsen nassuiaavoq.

Angutit pingasut sumiiffimmi tassanerpiaq siorna aamma ajunaarput.

Powered by Labrador CMS