Politi: Serlersaarillutik pinerluttut amerliartortut
Kalaallit Nunaata Politiivi serlersaarinerit pillugit nalunaarutiginninnerit amerlanerusut tigusalerpaat. Suliffeqarfiit aamma innuttaasut pigisaannik serlersaarisoqarsimaneranik nalunaarutiginninnerit malunnaatilimmik amerleriarsimasut, politiit tusagassiorfinnut nalunaaruteqarput.
Suliffeqarfiit innuttaasullu amerlaneruleriartuinnat igalaanik sequtserisoqarsimaneranik aamma biilinut serlersaarisoqarsimaneranik nalunaarutiginnittarput. Kalaallit Nunaata Politiivi tusagassiorfinnut taama nalunaaruteqarput.
Kalaallit Nunaata Politiivi serlersaarfigineqartarnermik aamma misigisaqarput. Sapaatit akunneri marluk kingulliit ingerlaneranni politiinut serlersaarinerit pingasut misigineqarput. Soorlu politiit illuutaannut biiliinulluunniit aserorterinerit.
- Politiini Sisimiuni atorfeqartut sisamanngormat ullaakkut suliartorput suliffik biilillu serlersaarneqarsimasut. Politiit biilii pingasut aamma illuutip igalaavi aserorteriffigineqarsimapput. Serlersaarisoqareerneranit ullut arfinillit qaangiutiinnartut serlersaarisoqaqqippoq, Kalaallit Nunaanni Politiit ilisimatitsipput.
Sisimiuni meeqqerivik meeraaqqerivillu aamma serlersaarfigineqarsimapput, igalaat sequminneqarsimallutik.
Sisimiuni meeqqerivik Nuniaffik, Naja/Aleqa aamma politeeqarfik pingasunngornermi nal. 17.00-miit sisamanngornermi 17. september unnuaani nal. 6.00 tungaanut serlersaarneqarneranik takunnissimasinnaasut, politiit ujartorpaat.
- Meeqqerivinnut serlersaarisoqarsimasoq, biilit sequtserneqarsimasut aamma politeeqarfik serlersaarfigineqarsimasoq suliartorluni pakatsinarluinnarpoq. Sulinermut sunniuteqarluinnartarpoq, suliassallu pingaaruteqartut kingulliuttariaqalertarpagut. Soorunami eqqarsalersitsisarpoq. Kina taamaaliortarami? Meeqqat ulluinnarni ornittagaanni igalaanik kina sequtserisarami, Sisimiut Politiini politikommissær Karl Jørgen Lennert oqarpoq.
Politeeqarfimmi maanna videokkut nakkutilliineq atorneqalerpoq.
Nuna tamakkerlugu taamaattoqarpoq
Qaqortoq Politiit biilii piffissami qanittumi aamma taama serlersaarfigineqarsimapput, biilit igalaavi sequtserneqarsimallutik.
- Nuna tamakkerlugu taamaaliortoqarnera ajoraluartumik maluginiarparput, uagutsinnullu toqqaannaartumik aamma serlersaarisoqarluni. Politiit sulinerannut tamanna ilungersunarnerulersitsivoq, aammali ajornermik pisoqarsinnaavoq, tassami innuttaasunut ikiuineq kingusinaarnerusumik peratarsinnaalermat. Serlersaarisunik takunneratarsinnaaneq, takunnikkaannilu uagutsinnut nalunaartoqarnissaa kaammattuutigiumavarput, tamatta ataatsimoorluta nakkutiginninniassagatta, politimester Bjørn Tegner Bay oqarpoq.
Nuummi Atuarfik Samuel Kleinschmidt sisamanngormat unnuaani aamma serlersaarfigineqarpoq. Tassani igalaat arlallit sequminneqarsimallutik.