Politimester: Pinerluttoqartillugu nalunaarutiginninnerit amerleriarnissaat naatsorsuutigaarput
Sulianik aalajangersimasunik aallussinerulerneq innuttaasunullu pinerluffigineqarsimasunut nalunaarutiginneqqusilluni kaammattuineq, nalunaarutiginninnerit amerlinerannik kinguneqarpoq. Politimester Bjørn Tegner Bay taama isumaqarpoq, siunissamilu nalunaarutiginninnerit amerlinissaanik aamma naatsorsuuteqarnerarluni.
Kinguaassiuutitigut pinerliinerit persuttaanerit taamatullu inuunermik ulorianartorsiortitsilluni pinerliinerit ukiuni tallimani kingullerni amerliartuinnarsimapput.
Nalunaarutiginninnerilli ukiuni kingullerni amerliartuinnarnerat ajortuinnartut isigineqartariaqanngilaq. Politimester Bjørn Tegner Bay taama isumaqarpoq, naatsorsuutiginerarlugulu politiit nalunaarutiginninnernik amerlanerusunik tigusaqartalernissaat.
Kisitsisit qaffannissaat naatsorsuutigineqarpoq
Kalaallit Nunaata Politiivisa ilisimatitsissutigaat kinguaassiuutitigut kannguttaatsuliornerit suliassatut politiinit ukkatarineqarnerunerat, nalunaarutiginninnerit amerlinerannut attuumassuteqarsinnaasoq. Ukiumoortumik nalunaarusiornermi takuneqarsinnaavoq pinngitsaaliisoqarsimatillugu nalunaarutiginninnerit 30 procentimik amerleriarsimasut.
Nalunaarutiginninnerit amerleriarsimanerat pinerluttoqarnerulersimaneranik takussutissiinertut isigineqartariaqanngilaq, amerlanerusulli pinerluttoqartillugu nalunaarutiginnikkumassuseqarnerannik takussutissaasinnaalluni:
- Kinguaassiuutitigut kannguttaatsuliortoqarsimarillugu nalunaarutiginninnerit 2020-mi ukiumoortumik nalunaarusiami amerlanerunissaat naatsorsuutigaara, ukiullu tulliuttut aamma taamaassinnaavoq, politimester Bjørn Tegner Bay oqarpoq ilallugulu:
- Nalunaarutiginninnissamut kaammattuutitut suliniuterput, Kalaallit Nunaata Politiivisa februarimi saqqummersitaat tunngavigalugu neriuutigaarput kinguaassiuutitigut kannguttaatsuliorfigineqarsimasut amerlanerusut nalunaarutiginnissasut. Taamaaliornikkut pinerlunnerit nalunaarutigineqarneq ajortut ikiliartortinneqarnissaat naatsorsuutigisinnaagatsigu, suliniut, pingaartumik meeqqat kinguaassiuutitigut kannguttaatsuliorfigineqarsimasut politiinut nalunaarutiginninnissaannut kaammattuuteqartoq pillugu oqarpoq.
Persuttaanerit amerlanerunerat ernumanarpoq
Kalaallit Nunaata Politiivi persuttaasarnerit amerlanerat pillugu ernumassuteqarlutik siusinnerusukkut oqariartuuteqarsimapput.
Nalunaarutiginninnerilli taama amerlanerutiginerannut, pinerluutinut taakkununngarpiaq ukkataqarneruneq, eqqortumillu nalunaarsuinerit peqqutaaqataasinnaapput.
- Tamanna ilaatigut tunngavigalugu Kalaallit Nunaata Politiivini persuttaasarnerit ikilisinniarlugit ukkatarinninneruvugut, ilaatigut persuttaasoqarsimatillugu suliap suliarineqarnera sivikinnerulersillugu, pinerluuteqartup piaartumik pineqaatissinneqarnissaa tikitserlugu, Kalaallit Nunaata Politiivinit ilisimatitsissutigineqarpoq.