Politimesteri: Radiukkut atortorissaarutit isumannaallisaanermut pingaaruteqarput
Politimesterip Bjørn Tegner Bayip radiukkut atortorissaarutissat nutaa kinguaattoorutigineqarnerat ugggoraa, qularnngilaali suliassap naammassineqarumaarnera. Tamannami politiit isumannaatsuunissaannut pingaaruteqarmat.
Politiit radiukkut atortorissaarutissaat nutaat qaammatit aqqaneq-marluk 18-illu akornanni kinguaattoorutigineqarallarput, tassa neqeroorutigineqarsimasut akisuallaarmata neqeroortitsineq unitsinneqarmat.
- Aallaqqaammut ugguaammerpunga, radiukkummi atortorissaarutit piffissami sivisuumi pisariaqartissimavanut, politimesteri Bjørn Tegner Bay Sermitsiaq.AG-mut oqarpoq.
Taassuma oqaluttuaraa, atortorissaarutit nutaat politiit isumannaatsuunissaannut pingaaruteqarmata, atortorissaarutissat nutaat pissarsiarineqarnissaat tamaviaarluni sulissutigiuarniarlugu.
Atortunik Illersornissaqarfimmit attartorsimasut
Kalaallit Nunaanni Politiit Illersornissaqarfiup radiukkut atortorissaarutaannik ajunngivissunik maannakkorpiaq attartugaqarput, Nuummi atorneqartunik. Politimesterip oqaluttuaraa, attartukkamik atuinnarnissaannut akuerisaasimallutik:
- Atortorissaarutit nunani allani annertuumik suliaqarnermi atugassiaapput, Nuummilu maani ajunngivissumik atorneqarlutik, Bjørn Tegner Bay oqarpoq.
”Nuuk” immikkut naqissuserlugu taavaa, Nuummimi pigaartut atortorissaarutaat assersuutigalugu Qaqortumi Upernavimmiluunniit politiit radiuinut maanna attaveqanngimmata. Attaveqaqatigiinneq mobiltelefoni aqqutigalugu pisarpoq:
- Tassa politeeqarfiup avataani suliaqartut imaaliinnaq attavigisinnaanngilatit, taamalu oqarasuaatikkut siarnguttut allat assigalugit utaqqisariaqarputit, politimesteri oqarpoq.
Atortorsissaarutit nutaat ikiortissarsiorneq ajornannginnerulersissagaat
Taamaammat radiukkut atortorissaarutit nutaa nunami politiit isumannaannerulersisssavaat:
- Assersuutigalugu imerniartarfimmi parruttoqarnerani allerpaallutit inissisimaninni, mobiltelefonimi kisitsisit arfinillit naqittarniarneranit radiumi tuugassap ataasiinnaap naqinnissaa ajornannginneruvoq.
- Tassa ikiortissarsiornissaq ajornannginnerulissaaq, taamaammat tamaviaarlunga atortorissaaruteqarlernissarput sulissutigaara, Bjørn Tegner Bay oqarpoq.
Atortorissaarutissamut isumalluartoq
Taassuma itisiliilluni oqaatigaa, atortorissaarutissamut nutaamut piumasaqaataasoq, politiit ajornartoornermi tuugassaqarnissaat. Kalerrisaarut allartissavaat, pigaartunit takuneqarsinnaanngorlugu, politeeq ajornartorsiortoq, aamma atortorissaarut aqqutigalugu politeeq sumiissusersineqarsinnaassaaq:
- Politerluunniit oqaaseqarsinnaanngikkaluarpat kalerrinneqassaagut, politimesteri nassuiaavoq.
Naalagaaffiup politiivisa suliassamut piffissaliussaq qularnartoqartippaat, naatsorsuutigineqarlunili qaammatit aqqaneq-marluk 18-illu akornanni kinguaattoorfiussasoq. Qularnartoqartitsisoqaraluartoq, politimesterip qularutiginngilaa suliassaq naammassineqarumaartoq:
- Naalagaaffiup politiivi erseqqissumik uannut nalunaaruteqarput. Tassalu kinguaattoortoqaraluartoq suliaa sulissutigineqartoq. Taamaammat oqarpunga uggoralugu, ernumanngilangali.