Politimesteri: Pinngitsaaliisoqarsimaneranik nalunaarutiginninnerit amerlalluinnartut
Siorna pinngitsaaliisoqarsimaneranik nalunaarutiginninnerit 30 procentit sinnerlugit amerleriarsimasut, kannguttaatsuliorfigineqarsimanernik nalunaarutiginninnerit 24 procentimik amerleriarsimapput.
Kinguaassiuutitigut innimiilliortarneq kinguaassiuutitigullu kannguttaatsuliortarneq kikkunnit tamanit oqallisigineqaleruttortoq, Kalaallit Nunaanni Politiit nalunaarutigaat, kannguttaatsuliorsimasut pinngitsaaliisimasullu pillugit nalunaarutiginnittoqarsimaneratigut suliat amerleriarujussuarsimasut. Kannguttaatsuliorsimanermi ilaatigut pineqartarpoq, inuup ataatsip inuk alla piumanngtsoq timaatigut attuualaarsimappagu.
- Amerleriarnerat ingasappoq amerlassusaallu eqqarsarnarluni, Kalaallit Nunaanni politimesteri Bjørn Tegner Bay oqarpoq.
Taannali isumaqarpoq, kisitsisit taamak amerlatiginerannut inuit amerlanerit nalunaaruteqarnissamut sapiukkunnaanerusimanerat pissutaasinnaasoq, taamalu innarliinerit amerlanerulersimanngitsut.
- Amerleriarsimanerannik ernummatissaqarnerlunga naluara. Ilimagaara kisitsisaatiginngisatsinnik maanna pissarsisalersimasugut, taanna oqarpoq.
Ukkatarinninnerup nalunaaruteqartartut amerlanerulersissimagai
Piviusut
Kisitsisit parentiisimiittut 2018-imeersuupput
Pinngitaaliinerit: 207 (156)
Kannguttaatsuliornerit: 230 (185)
Pissarsiffik: Kalaallit Nunaanni Politiit 2019-imut ukiummoortumik naatsorsuusiaat
Politimesteri isumaqarpoq, meeqqanik innarliisimanerit pillugit maannakkorpiaq paasititsiniaasoqarnera sunniuteqarsimassasoq. Taanna aamma isumaqarpoq, kinguaassiuutitigut innimiilliortoqarsimaneranik oqallinneq aamma #MeToo pissutaallutik inuit amerlanerit politiinut nalunaarutiginninnissamut qunujunnaarlutik, arlaatigut innimiilliorfigitissimanerminnik politiinut nalunaarutiginnittalersimasut. Taamaakkaluartoq kisitsit ernumanartortaqarput, politimesteri erseqqissaavoq.
- Nalunaarutiginninnerit amerlasoorujussuupput, soorunami nunami Kalaallit Nunaannitut ittumi taamak amerlatigisunik nalunaarutiginnittoqartarnera ernumanarpoq, taanna oqarpoq.
Pinngitsaaliisoqarsimaneranik suliat Kalaallit Nunaanni taamaallaat amerliartunngillat.
Danmarkimit nalunaarutip nutaap takutippaa, 2019-imi arnat 6.700-nik amerlanerusut pinngitsaalineqarsimallutilluunniit pinngitsaaleriarneqarsimagaluartut. Kisitsisit ukiut qulit ingerlaneranni marloriaataat sinnerlugit amerleriarsimapput.