Skip to main content

Politimesterip matulerisutut nakkutilliisutullu ilinniartoqarsinnaalernissaa kissaatigaa

Nuummi matulerisoq saqqummerluni Nuummi unnuami ajornartorsiutit oqaluttuarai. Ikiaroornartumik tuniniaaneq, nakuuserneq, aamma matulerisut ilinniarsimannginnerat imerniartarfimmiittut isumannaatsuunerannut sunniuteqartarput.

- Christian Langstedip isummersuutai ernumassutaalu paasisinnaavakka, taamaattorli tamanut atuuttutut oqaatiginninnissaq mianersuuttariaqartoq isumaqarpunga, politimesteri Bjørn Tegner Bay, matulerisuusimasup Nuuk Ugeavisimi allaaserisami allami oqaatigisaanut, oqaaseqaateqarluni allappoq.

- Matulerisutut nakkutilliisutullu ilinniarfeqalernissaa politiinit kissaatigigipput qularutigineqassanngilaq, aamma matulerisut nakkutilliisullu qanoq ittuunissaannik piumasaqaateqarnissaq pissutissaqarluarsoraarput (atuaruk: pinerlussimasutut pineqaatissinneqarsimappat?). Matulerisut pikkorissut ulluinnarni naammattoortarpagut, taamaattorli qularutissaanngilaq ilinniarnerup pitsaassusermik qaffatsitsisinnaanera, taamatullu matulerisut piginnaasanik sulinermi atorsinnaasaminnik pissarsisinnanerat – arsersuutigalugu akerleriittoqartillugu aaqqiiniarnermi ikiueqqaarnermiluunniit, politimesteri oqarpoq.

Sutorniartarfinni ajornartorsiutaasutut Christian Langstedip taakkartugai, soorlu; matulerisut qassiusarnerannut ikiaroornartunillu hashinik tuniniaasoqartaneranut tunngasut politimesterip ilisarilluarsinnaavai.

Assigiinngissitaartut
- Naammattoortakkagut assigiinngisitaarput. Tassami sutorniartarfiit arlallit suleqatigisarneri pitsaalluinnartumik ingerlapput – pingaartumik aaqqissuussaalluartut – unnuakkut qiimasuttut toqqissisimanissaannik qulakkeerinnikkisuttuupput. Taamaakkaluartoq nassuerutigisariaqarpoq taakkartorneqartut akerlingi aamma naammattoortaratsigit, politimesteri oqarpoq.

- Nuannaarniartarfinni suliamik naammassinnilluarsinnaasunik naammattunik - soorlu matulerisunik - sulisoqarnissaq sutorniartarfiutillik akisussaaffigaat. Taamatuttaaq nuannaarniartarfiit inatsisit malillugit ingerlanneqarnissaat; soorlu inatsisip ersarissumik aalakoortunut sassaalleeqqusaannginnermut tunngasup malinneqarnissaa piginnittut akisissaaffigaat, politimesteri ersarissaavoq.

- Inatsisit malinneqarnissaat qulakkeerniarlugu sutorniartarfiit arlallik iliuuseqartartut nalunngilarput, taamaakkaluartoq saneqqutsisoqartarpoq. Tassunga atatillugu naatsorsuutigilluinnaqqissaarpara sutorniartarfiutillik akisussaassuseqarlutik ikiaroornartumik hashimik akuersaarinninnatik piaartumik iliuuseqartassasut. Tamanna anisitsinikkut, piffissami aalajangersimasumi iseqqusaajunnaarsitsinikkut hashimillu tuniniaasup politiinut nalunaarutigineqartigut pisarsinnaavoq. Taamatuttaaq aamma naatsorsuutigaara inuit ima aalakootigilissanngitsut allaat nerivinni siniliinnartarlutik, Bjørn Tegner Bay oqarpoq.

Politiinik isornartorsiorneq ilalinngikkaa
Christian Langstedip isornartorsiuinermini ilaatigut ikiaroornartumik hashimik tuniniaasoqarsimatillugu matulerisut ilisimatitsigaangata politiit ajornartorsiummik soqutiginninngittarnerarlugit iliuuseqartannginnerarlugillu isornartorsiorpai.

Tamannali politimesterip isumaqatiginngilaa.

- Christian Langstedip ajornartorsiummik isiginninnera allanngortissinnaanngilara, taamaattoq innuttaasut nuannaarniartarfinni sutorniartarfinnilu atuisuusut killormuanik oqariartuuteqassasut qularutiginngilara, politimesteri oqarpoq, nagillunilu:

- Hashimik tuniniaasarnerup akiorneqarnera politiinit pingaartinneqaqaaq, tamanna assersuutigiinnarlugu Sermitsiaq.ag-mi ”hash”-i ujaarlerfigineratigut imaluunniit politiit kisitsisit atorlugit nassuiaasiaanni takuneqarsinnaapput. Taamaakkaluartoq politiit unnuami alapernaarsuisuusut ikiaroornartoqarneranik nalunaarfigineqarsimatillutik pingaarnersiuisarsinnaanerat ilumuunnginnerarsinnaanngilara. Tassami persuttaasoqarsimatillugu, angerlarsimaffinni eqqissiviilliortoqartillugu, pinngitsaaliisoqartillugu ikuallattoqartilluguluunniit ikiaroornartulerisoqarsimaneranik nalunaartoqartilugu qisuariannginnissaq allatut ajornarsinnaasarpoq, Bjørn Tegner Bay nassuiaavoq.

Suleqatigiinnerusariaqartut
- Christian Langsted isumaqatigilluinnarpara oqarmat; Sutorniartarfinni toqqissisimaneq anguniarlugu suleqatigiinnerusariaqartugut. Suleqatigiinneq piffiit ilaanni pioreerpoq, tamannali pitsaanerulersinneqarsinnaallunilu piffinni amerlanerni atuutilersinneqarsinnaavoq, politimesteri oqarpoq.

Nuuk Ugeavisimi aamma atuakkit:

Matulerisoq ernumassutilik saqqummertoq

Agathe Fontain: Matulerisumut akisussaassuseqartumut sapiitsumullu qujanaq

Isornartorsiuineq pisortap isumaqatiginngilaa

Allaaserisat uani ataani linkimi atuarsinnaavatit, Nuuk Ugeavisi digitaliusoq tassaniippoq:

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER