Politimesteri: Imminut toqunnissamik sioorasaarinerit inuiaqatigiinni ajornartorsiutaapput
Inuit amerlanerujartuinnartut imminut toqunnissamik sioorasaaralutik politiinut sianertalersimapput. Pisut amerlanersaanni sioorasaarinerit ilumoorunneqartanngillat, politiinilli tamatigut assigiimmik ilumoorussinertut nalilerlugit suliarineqartarlutik.
1200.
2020-mi imminut toqunnissamik sioorasaarineq taama amerlatiginerat politiit ukiumoortumik kisitsisitigut paasissutissaataanni saqqummiunneqaqqammersumi atuarneqarsinnaavoq.
Sioorasaarinerpassuit – qaammammut 100-t imaluunniit ullormut pingasut – 2019-imi 977-iniit siornamut amerleriarsimapput inuiaqatigiinnilu ajornartorsiutaallutik, politimester Bjørn Tegner Bay ukiumoortumik nalunaarusiap saqqummiunneqarneranut atatillugu oqarpoq.
Taanna aviisimut AG-mut erseqqissaavoq, inuit ikiorneqarnissamik pisariaqartitsisimagunik saaffiginnittarnerat soorunami pissusissamisoortoq.
- Ikioqqusarnerat ajunngilluinnarpoq. Kisianni soorluuna kultureqalersimasugut imminut toqunnissamik sioorasaarinerit tatisiniutitut atorneqarfigisaannik. Inuk sioorasaarisoq pimoorussinianngikkaluartoq, Bjørn T. Bay oqarpoq.
Aallaaseqarsinnaasartut
Politimesteri naapertorlugu imminut toqunnissamik sioorasaarinernik suliat amerlanerpaartaat piviusuusanngillat ima paasillugu inuup imminut toqunniarnera piviusuni pineqartarnani.
- Amerlanertigut inuk pineqartoq sumiiffissigaangatsigu pineqartoq oqartarpoq, imminut toqunnissamik pimoorussisinnaanngilluinnarluni. Ajornartorsiutaaginnartoq tassaassarpoq inuup tamatuminnga assersuutigalugu anaanaminut ersersitsisimanera taamalu anaanasup uagutsinnut sianertarnera, Bjørn T. Bay nassuiaavoq.
Politiinut imminut toqunnissamik sioorasaarisumut ilaqutaasoq imaluunniit inuk nammineq politiinut sianeraangata pimoorussisoqarnersoq nalilersussallugu ajornakusoortarpoq. Taamaattumik politiit upalungaarsimasui orniguttarput, ilaatigut inuk aallaammik sakkoqarsimatillugu ornigunnermi atortunik annertuunik nassataqarlutik.
- Inuit ambulancinik, kiisalu politiit qatserisartullu biiliinik tamakkiisumik orniguttunik takugaangata najukkami inuiaqatigiinni ernumaneq toqqissisimannginnerlu pilersarput, Bjørn T. Bay oqarpoq.
Allaaserineqartoq aviisimi AG-mi tamakkiisumik atuaruk. Aviisi uani pisiarineqarsinnaavoq: