Politimesteri sarfaarunnerata kingorna: Immaqa ilorrisimaarpallaalersimavugut
Sapaatip akunnerani matumani sivisunerusumik sivikinnerusumillu innaallagiap qamittarnerata malitsigisaanik oqarasuaatit internetsilu attaveerummata avammut attaveqarniarnermi unammillernartoqarsimavoq. Politimesterip eqqaasitsissutigaa, ajutoortoqaqqissagaluarpat immitsinnut ikiorniarluta angerlarsimaffitsinni radiutoqqavut atortassagivut.
Siullermik innaallagiaaruppoq, tullianik internetsi attaveeruppoq, naggataatigullu Nuummiut nunamilu innuttaasut allat arlallit sivisuumik innaallagiaqannginnerata malitsigisaanik oqarasuaatitik atorsinnaajunnaarpaat.
Upalungaarsimasut ulapilersimapput, politimesterilu Bjørn Tegner Bay freerfeerulluni sulilerluni. Tamatumunnga pissutaanerpaavoq, nalunaaquttap akunnerisa qulingiluat missaanni innaallagiaqannginnerata kinguneranik internetsimut oqarasuaatinullu attaveerummata politiit marlunngornerup ullaavani upalungaarsimalersimanerat.
- Innaallagiaqannginnerata nalaani atassuteqaateqaannarnerput ajorsimanngilaq. Pisummit atassuteqaateqarnitsinni aqussinnaasimavagut. Mobiltelefoninulli internetsimullu attaveqaatit ajortimmata politiitut suliassavut ernummatigilersimavagut, toqqissisimajunaartoqarpormi.
Taamatut pisoqarmat siullertut paasiniartussanngorsimavarput, innuttaasunut qanoq attaveqartassanerluta. KNR-kkut radioavisi iluaqutissatut isumassarsiaripallakkaluarparput, tassungali atatillugu unammilligassaq alla takkuppoq.
- Qanga tamatta radioqarsimavugut immikkut batterilertagassanik. Maannalu mobiltelefonit internetsilu ima sungiussimatigivagut allaat taakku puigorsimallutigit, Bjørn Tegner Bay oqarpoq.
Qanga ullut
-Immaqa ilorrisimaarpallaalersimavugut. Qanga tamatta, maannatut pisoqarnerani atorsinnaasatsinnik, taanna oqarpoq.
Aamma ullup ingerlanerani inuit arlallit biiliminni radioavisimik tusarnaartut takuneqarsinnaasarpatut, inuillu ikiorneqarnissamik pisariaqartitsisut allatut eqqarsarsinnaasarsimapput, politiit oqaluttuarput.
- Inuit ikiorneqarnissamik pisariaqartitsisut aqqusinermi politiit qatserisartullu biiliinik unitsitsisarsimapput, alla biilerlutik politeeqarfimmukartarlutik.
Bjørn Tegner Bayip erseqqissaassutigaa, nalinginnaasumik pisartut saniatigut politiit imatut suliassaqarsimanngitsut.
- Piffissap ilaani aamma eqqarsaatigisimavarput højtalerilerluta aqqusinermiissanerluta, nalilersimavarpulli inuit biiliminni angerlarsimaffimminnilu radioqartut batterilinnik, taakkulu aqqutigalugit paasissutissiisinnaalluta.
Ajornerpaamik pisoqassappat politiit aqqusinermi takussaassasut
Politimesterip nassuerutigaa, taamatut ajornartorsiortoqalersillugu avammut attaveqarniarneq pitsaanerusinnaasoq, pingaartumik nalunaaquttap akunnerini siullerni uivertoqartillugu.
- Ullup unnuallu siulliup ingerlanerani allanngortinneqartut ilagaat, innaallagissap qaminnerani teknikkikkut attaveqarsinnaaneq, Tusassimit Nukissiorfinniillu ingerlanneqartumik. Politeeqarfimmi upalungaarsimasut qitiusumit attaveqartitsigaluartut taamatut pisoqarnerani tamanna eqqaamasariaqarparput, taanna oqarpoq.
Bjørn Tegner Bayip innuttaasunut kaammattuutigaa, innaallagissap qaminnerani radiotoqqaminnik saqqummeeqqullugit, ajornartoornermi oqartussat paasissutissiissutaannik pissarsisarniassammata.
- KNR-p atortorissaarutai aamma ajortissappata radiokkullu aallakaatitsisoqarsinnaajunnaarluni, taava højtalerilerluta aqqusinermi paasissutissiisarnissaq periarfissaraarput, politimesteri naggasiivoq.