- Naalagaaffeqatigiinneq aatsaat taama unammillerneqartigaaq. Nutarsaanissaq pisariaqarluinnartoq takuneqarsinnaavoq. Danmarkip Kalaallit Nunaatalu attaveqarnerat ilungersunarneruleriartorpoq, Christian Schultz-Lorentzen, aviisimi AG-mi aaqqissuisuuneq politikkikkullu naliliisartoq oqarpoq.

Nunatta folketingimi ilaasortaatitaa, Aki-Matilda Høegh-Dam (S) Folketingimi oqaluttarfimmut qaqeriarluni oqalugiarluni aallartimmat ataatsimiittarfimmi paatsuugasoqarluinnarpoq. Naalagaaffeqatigiinneq pillugu oqallinnermi folketingimi ilaasortap kalaaliusup oqalugiutini kalaallisut atuarpaa, aperineqartillunilu kalaallisut taamaallaat aamma akiumalluni.

- Kalaallit Nunaanni nutaarsiassaqartitsiviit taamaallaat atugassaannut tunngasumi uani peqataanianngilanga, SF-imi nunarput pillugu oqaaseqartartoq, Karsten Hønge, folketingimi ilaasortaaqatini peqatigalugit qallunaatut aperisaraluartoq, taama oqarpoq.

- Ilaat isumaqarsinnaapput Aki-Matilda Høegh-Damip taama iliornera Siumut julimi ataatsimeersualerpat partiimi siulittaasunngorniuunnissamut tunngatillugu iliuuserigaa. Tassa partiimi politikkianut tunngassuteqartumik iliuuseqartoq, Christian Schultz-Lorentzen oqarpoq nangillunilu:

- Taamaaliornerali Danmarkip Kalaallit Nunaatalu akornanni ilungersunartoqarneranik takussutissatut isigineqartariaqarpoq. Kalaallit Nunaanni innuttaasut arlallit naalagaaffeqatigiinneq pituttuisutut isigaat. Ukiuni makkunani politikkikkut eqeersimaartoqarpoq, nunap kulturikkut inooriaatsiminik tunngaveqartumik ingerlanissaa pillugu. Nunasiaataasimanerup kingunerinik akerliuneq maanna saqqumilluinnarpoq. Avataaniit aqunneqarneq akerlerineqarpoq. Taamaammat naalagaaffeqatigiinnerup aaqqissuussaanera misissorneqartariaqarpoq. Immaqa suleqatigiinnermik allaanerusumik nassaartoqarsinnaagaluarpoq. Aammali avinnerit iluaqutaanerpaaratarsinnaasarput. Maannakkutut tusiapillattuaannarsinnaanngilagut. Naalagaaffeqatigiinneq piffissamut tulluanngilaq, Christian Schultz-Lorentzen oqarpooq. Taamallu iliortoqarsimanera pillugu Danmarkimi innuttaasut qisuariarnissaat ilimagalugu aamma isummerluni.

Isornartorsiorneqarneq qatsukkaat

- Maluginiartarpara qallunaat amerlaneruleriartortut Kalaallit Nunaanniit nunasiaataasimaneq pillugu isornartorsiorneqartarnerminnik qatsussilertut. Taakkumi namminneerlutik nunasiaateqarsimanngillat, kingunerili kingornutaralugit, Christian Schultz-Lorentzen oqarpoq. 

Oqallinnerup kinguninngua Aki-Matilda Høegh-Dam pisumit sunnersimaneqarpoq. Taanna Ritzaumut oqaluttuarpoq oqalugiutissani kalaallisut aamma qallunaatut piareersarsimallugu. Sermitsiaq.AG-mut nassuiaavoq oqaatsit ilitsoqqussarisat atorlugit Folketingip oqaluttarfiani aamma oqalugiartoqarsinnaasariaqartoq.

- Nunarput sinnerlugu qinigaavunga. Folketingimili oqaatsikka, nunatsinni pisortatigoortumik oqaatsivut, atorlugit, nunaqqatikka sinnerlugit sassarsinnaasanngilanga. Tamanna ajortoqarsoraara, Aki-Matilda Høegh-Dam oqarpoq. Taassuma neriuutigaa Folketingimi oqaluttarfimmit kalaallisut oqaluttoqartarnissaa siunissami periarfissaalissasoq.