Inatsisartut
Politikkikkut sulinermut aningaasaliissutaasussat isornartorsiorneqartut
Partiit naammattunik aningaasaateqarput aamma tapiissutit qaffanneqarnissaannut pisariaqartitsinngillat, Demokraatit taama isumaqarput, taakku partiinut politikkimik suliaqartunut tapiissutit ataatsimoortut qaffanniarlugit siunnersuuteqartoqassappat naaggaarniarput.
- Partiit Inatsisartuniittut naammattunik aningaasaateqarput. Inatsisartut Siulittaasoqarfiata siunnersuutaa aningaasaqarnikkut akisussaassuseqannginneruvoq, Demokraatiniillu tapersersorneqarnavianngilaq.
Akileraartartut siunissami partiinut Inatsisartuniittunut saniatigut 3 millionit koruuninik akiliinerusalernissaannik Inatsisartut Siulittaasoqarfiat siunnersuummik saqqummiussaqarnerata kingorna, partiip illuatungiliuttup siulittaasua Randi Vestergaard Evaldsen (D) tusagassiuutinut nalunaarummi taama allappoq.
Partiit ukiumut 10 millionit koruuninik pisartagaqareerput.
Atuaruk: Naalakkersuinermik sulinermut tapiissutinik millioninik qaffaaneq
Siumut aamma IA isornartorsiorneqartut
- Tamanna ersarissumik takuneqarsinnaavoq, partiit naatsorsuutaat qiviaraanni. Partiit angisuut akiitsorsuarminnut ilungersuuteqartut IA Siumullu ukiut kingulliit ingerlanerini akiitsutik ikilisarniarlugit malunnartumik akiliigaatsiartarnikuupput peqataanik partii ingerlatiutigalugu. Taamaaliornermut partiinut tapiissutit mikivallaarnerat pissutaasimagunanngilaq, Randi Vestergaard Evaldsen erseqqissaavoq.
Demokraatilli periutsit allanngortikkusuppaat.
- Ullumikkut partiit Inatsisartuuniititaqartut tunngaviusumik tapiissummik pisarput qaavatigullu ilaasortaatitat tapiissutisiaqaataasarlutik. Periutsip 1. januaari 2018-mi ilusitaava tunngavigalugu Atassut pilliutigineqartussaavoq, ilaasortat partiinut allanut nuunneri pissutigalugit partiitut tapiiffigineqarsinnaajunnaartussaagami. Tamanna naapertuutinngilaq, taanna oqarpoq.
D: Ilaasortanut tapiissut atorunnaarli
Demokraatinit taamaattumik kissaatigineqarpoq allanngortitsisoqassasoq, partiit tunngaviusumik Inatsisartuniititaqartut tapiissummik pisalersillugit. Partii paarlattuanik kissaateqarpoq ilaasortaatitaqarnermut tapiissutit peerneqassasut, tapeeriaatsimik allamik taarserlugu, partiit taasisuinik ataasiakkaanik tunngaveqalersillugu, partiit ataasiakkaat kingullermik Inatsisartunut qinersisoqarmat taasisaat tunngavigalugit tapiissutisisalersillugit.
- Inatsisartut Siulittaasoqarfiata siunnersuutaa aningaasatigut akisussaassuseqanngitsuliorneruvoq taamaatumik Demokraatit tapersiinavianngillat. Aamma taamaappoq Inatsisartunut ilaasortat akissarsiaat qaffanniarneqassappata. Akissarsianut aningaasartuutit aamma qaffanneqassanngillat. Akerlerinngilarput Inatsisartunut ilaasortat ataasiakkaat akissarsiaqarnerulernissaat, taamaattoqassappalli Inatsisartuni ilaasortat ikilisinneqartariaqassapput assersuutigalugu 25-niit 21-nut. Taava akissarsiat qaffannissaat akissaqartinneqalissagaluarpoq inuiaqatigiit ataatsimut aningaasaqarnerat innarlernagu, Randi Vestergaard Evaldsen oqarpoq.