Politikkikkut sulineq aporaaffittaqaqisoq
Pissutissalimmik pasitsannarpoq Naalakkersuisut, partiit siuttuisa aammalu nappaatit tuniluuttut pillugit ataatsimiititaliarsuup sulinerat Inatsisartut siulittaasoqarfiata naammaginanngilluinnartutut nalilersimagaa. Taamaammat Naalakkersuisut qanoq sulinersut pillugit nakkutilliinissaq siunniussimagaat.
Innuttaasut ilarpassuisa aqqutissat assigiinngitsut atorlugit aamma inuit nittartakkatigut naapeqatigiittarfii atorlugit Naalakkersuisut, partiit siuttuisa aamma nappaatit tuniluuttut pillugit ataatsimiititaliarsuup sulinerinik naammagisimaarinninnerminnik saqqummiussisarput, matumani tuniluutilertoqannginnissaanik iliuutsit aammalu taassuma saniatigut sulisoqarnermut inuussutissarsiuteqartunullu tapersersuinissaq siunertaralugu ikiuutit pineqarpata, naammagisimaarinninneq ersersinneqarluni.
Aviisi Sermitsiaq taama allappoq.
Suliamut ilisimasallit ingerlatsinerisa, tassa nakoorsaanerup politiillu pisortaanerata aqutaannik inatsisit malillugit sulinerisa saniatigut Naalakkersuisut partiillu siuttuisa naalakkersuisooqatigiittuuneq illuatungiliuttuunerlu akimorlugit politikkikkut suleqatigiissinnaasimapput, naak massa suleqatigiinneq aqqutaani ajornakusoorsisarsimagaluartoq.
Allorissaaqatigiinneq
Tassa nalaatat ilungersunartut navianartorsiornermik nassatallit tunngavigalugit partiit siuttui nassaareqatigeeqqipput suleqatigiinnertillu nangillugu allorissaaqatigiileqqipput.
Tamanna paasinarsivoq ataasinngormat ullaakkut partiit siuttuisa ataatsimoorlutik tusagassiiortunik katersortitsineranni, tassanimi suleqatigiinnertik nukittorsassallugu piumassutsiminnik ersersitsipput. Tamannami pisariaqarmat, tassami coronap ajornartoortitsinera qaangiuteqqajanngilaq, nunatsinni aamma nunani tamalaani nualluut annikinngitsumik ajornartorsiortitsiuarsinnarmat aammalu maanna nunatta avammut ammaqqikkiartuaarnissaa timitalersorneqartussanngormat tuniluuttoqalersinnaanerata aarlerinartorsiortitsinera aamma annerulertussaammat. Pissutsit taamaannerisa kingunerisaanik aammalu nunatta ammariartuaaqqinnerani partiit siuttui ataatsimoortariaqarnitsinnik oqariartuuteqarput.
Taamaattorli partiit siuttui aammalu minnerunngitsumik Naalakkersuisut siulittaasuat, Kim Kielsen (S) qanoq tapersersorneqartigippat tunuliaquttaminnit?
Aviisimi Sermitsiami atuarnerusinnaavutit - aviisi uani pissarsiariuk: