Skip to main content

Politikkikkut naliliisartoq: Tusaamasat qinersinermi iluaquteqarsinnaapput

Tusaamasat qineqqusaarnermi saqqumilaareernertik pissutigalugu iluaqutissaqangaatsiarsinnaasut, politikkikkut naliliisartoq Naja Paulsen oqarpoq. Kisianni qineqqusaarfiup nalaani saqqummernerisa, politikkimi tusaamasat inissaqartinneqassanersut aalajangissavaat

Sermitsiaq.AG-p siornatigut allaasereriigaatut tusaamasat arlallit apriilip sisamaanni kommunimut qinersinermut qinigassanngortipput.

Kommunimut qinigassanngortikkaanni tusaamaneqarneq iluaqutaangaatsiarsinnaavoq, politikkikkut naliliisartoq Naja Paulsen Sermitsiaq.AG-mut oqarpoq.

- Tusaamasat saqqumilaareernertik iluaqutigilluarsinnaavaat, qinersisartullu inunnik ilisimanerusaminnik taasisarput. Kisianni tusaamasat qineqqusaarnerup nalaani qanoq saqqummernerat apeqqutaassaaq, Naja Paulsen oqarpoq.

Atuaruk: Tv-imi quiasaarisartoq kommunimut qinigassanngortittoq

Qinersisartut assigiinngitsut marluk
Kisianni innuttaasut tusaamasat politikkimut qinissanerlugit nammineq aalajangissagaat taanna oqarpoq.

- Tassami qinersisartut assigiinngitsut marluupput. Qinersisartoqarpoq partiimik ataasiinnavimmik qinersisartut, aamma qinersisartoqarpoq allannguinermik takorusuttunik. Qinersisartullu ilaasa tusaamasat ataasiakkaat qineqqusaarneq aallartinngitsorluunniit qatsuteriissavaat, taamaammat ullormi qinersiffiusumi tusaamasat angusaqarluassanersut oqaatigineqarsinnaanngilaq, Naja Paulsen erseqqissaavoq.

Atuaruk: Inuussutissarsiortoq ilisarisimaneqarluartoq politikkimut sanguvoq

Tusaamasat arlallit politikkertut
Isikkammik arsartartut nunanut allanut unammisartut sungiusaasuat Tekle Ghebrelul aamma tv-imi quiasaarisartoq Hans Jukku Noahsen Inuit Ataqatigiinni qinigassanngortipput, inuussutissarsiortorlu Nicolai Nissen Siumumi qinigassanngortippoq.

Tusaamasallu politikkimi inissaqassasut ilimanarpoq, kiinnallu ilisarisimaneqarluartut politikkimi takussaalissavagut.

- Ilimanarluinnarpoq, kiinnat ilisarisimaneqarluartut qinigassanngortittut takoreerpagut, takussaanerulerumaartut ilimagaara, Naja Paulsen oqarpoq.

Atuaruk: Arsaattartunut sungiusaasoq: Taamaammat politikkikkut sassarpunga

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER