isumalioqatigiissitaq
Politikkikkut misilittagartuup isumalioqatigiissitamik suliaqarneq ataqatigiissaassavaa
Tunngaviusumik inatsisissaq pillugu isumalioqatigiissitap allaffeqarfiata pisortaatut toqqarneqarpoq
Angut assigiinngisitaartunik misilittagaqartoq Tunngaviusumik inatsisissaq pillugu isumalioqatigiissitamik suliaqarnermik ataqatigiissaarisunngussaaq.
Atorfinitsitsinissamut ataatsimiititaliami tamanit isumaqataaffigineqartumik, Johan Lund Olsen isumalioqatigiissitap allattoqarfiani pisortatut innersuussutigineqarpoq.
Tamatumunnga atatillugu isumalioqatigiissitani marlunni sulisimanera pingaartinneqarpoq. Namminersorneq Pillugu Isumalioqatigiissitami kalaaliinnarnik ilaasortaqartumi ukiuni 2000-miit 2003-imut ilaasortaavoq, aammalu Namminersorneq pillugu kalaallit qallunaallu Isumalioqatigiissitaanni ukiuni 2005-miit 2008-mut ilaasortaalluni.
- Johan Lund Olsen tunngaviusumik inatsisilerinermut tunngasunik, inuiaallu inatsisitigut inissisimaneri pillugit ilisimasaqarluartuuvoq, namminiilivinnermut, nunanut allanut nunalerinermullu naalakkersuisoqarfik tusagassiuutinut nalunaarummi allappoq.
- Isumalioqatigiissitani marlunni sulinera assut nuannarisimavara. Taamaattumik qilanaaqaanga Tunngaviusumik Inatsisissaq pillugu Isumalioqatigiissitap allaffeqarfiani pisortaaffigisassanni ilisimasakka piginnaasakkalu atorsinnaassagakkit, Johan Lund Olsen oqarpoq.
Isumaginninnermut naalakkersuisoqarfimmit immikkoortortami Johan Lund Olsen pisortaasimalluni atorfinippoq.
Inuit Ataqatigiit tunuliaqutigalugit sivisuumik politikeriunikuuvoq. Partii sinnerlugu Inatsisartuni kiisalu Folketingimi Sara Olsvigimut sinniisitut ilaasortaanikuulluni. Aammattaaq 2003-mit 2006-imut Naalakkersuisunut ilaasortaanikuuvoq.