Politikkikkit misilittagartuup peqqinnissaqarfik aamma isumaginninnermut immikkoortortaqarfik akisussaaffigilissavai

Isumaginninnermut aamma peqqissutsimut Naalakkersuinikkut aamma ingerlatsivinni suleqataasarsimasup Martha Abelsenip akisussaaffigilissavai.

Immikkoortortaqarfimmi nutaamik naalakkersuisoqaqqittariaqalernera illuatungiliuttunit isornartorsiorneqarpoq. Martha Abelsenilli toqqarneqarnera nersualaarneqarpoq.

Kanukoka

- Naalakkersuisunngortoq ukiorpassuarni ilisimasaraarput immikkoortumilu suliaqarnermi sulilluarnikuulluni, Suleqatigiissitsisunit Tillie Martinussen ilaatigut oqarpoq.

Martha Abelsen politikkikkut akuujunnaaraluarpoq ukiut pingasut matuma siorna. Nunami Namminermi Pissutsinut Allaffeqarfimmi immikkoortortami Martha Abelsen pisortaaqqaarpoq, kingornagut Isumaginninnermut Aqutsisoqarfiup immikkoortortaqarfiani pisortaalluni.

Kanukoka-mi sulinikuunera aamma ilisimalluarneqarpoq, tassani ukiuni 15-ni atorfeqarluni. Siunnersortitut suleqqaariarluni pisortatut tassani atorfeqarnikuuvoq. Kanukokami siulittaasutut toqqarneqarpoq 2010-mi.

Suliassarpassuit

Kommuneqarfik Sermersuumi aamma politikkeriunikuuvoq, ilaatigut borgmesterip sinniisuatut inissisimanikuulluni. Martha Abelsen Kommuneqarfik Sermersuumi borgmesterinngorniarluni 2013-mi qineqqusaarpoq.

Martha Abelsen naalakkersuisutut suliassarpassuaqassaaq. Suliniut Killiliisa, peqqinnissaqarfinni sulisunik amigaatit, kræfteqartunut katsorsaanerup pitsaanerulernissaa, imminut toquttartunut suliniutit kiisalu imigassamut inatsisip suliarinissaa suliassaanut ilaannarai.