Politikkeritut misilittagartooq: Sinissaaruttarpunga

Inuit attaveqaqatigiittarfiisigut ingasattumik pasilliinerit, aqqusinermi nilliaffigitillunilu qunusaarneqartarneq politikkeritut misilittagartuumut Justus Hansenimut ima ingasatsigilersimapput allaat siunissami politikkeriuinnassanerluni eqqarsaatigilersimallugu.

- Isumaqarlunga sunut tamanut makutsisimallunga. Ukioq mannali ataatsimiittoqarmat aatsaat taamak qasoqqatigaanga, Justus Hansen naalakkersuisooqatigiit ikorfartortaannit Demokraatineersoq oqaluttuarpoq.

- Unnuakkut iteriasaartarpunga eqqarsaasersulertalungalu, politikkeri illoqarfissuarmiit Tasiilamukarami ikinngutini ilaquttanilu nuannisaaqatigissallugit isumaqarsimagaluartoq nassuiaavoq.

Nuummili misigisimasani qaangeruminaatsippai.

Siulittaasoq sulisinneqangaatsiartoq

”Inersuup” avataani pisimasuinnaanngillat, aammali Inatsisartut siulittaasuat nunami oqaluttarfiit pingaarnersaanniit pitsaasumik oqaloqqusilluni innersuusseqattaartariaqartarsimavoq.

- Inatsisartut ataatsimiittarfianni inunnut sammititanik peqqarniitsumillu aatsaat taamak sakkortutigisumik pissusilersortoqartoq misigivara. Imminut aperisariaqarsimavunga, politkkeriuinnarnissaq imminut akilersinnaanersoq, Justus Hansen 100 kiilunik oqimaassuseqarluni allanut sanilliulluni tatitunerusussangatinneqarsinnaasoq oqarpoq.

Qineqqusaartutut nipilimmik oqalunneq unitsilli

Politikkereqatini kaammattorpa imminnut qiviaqqullugit inersuarmilu oqalliseriaaseq nalilersoqqullugu, qineqqusaartutut nipilimmik oqaluttarneq unitsinniarlugu.

- Ukiakkut ataatsimiinneq pasilliinerpassuarnik inunnillu saassusinerpassuarnik imalik qineqqusaarnertut sivisuutut ingerlanneqasimavoq. Tamanna siunertaanngilluinnaraluarpoq, Justus Hansen inuit inatsisartuni oqallinneq tusanngugileraangamikku radiomik qamitsisarnerannik paasinnissinnaasoq oqarpoq.

- Immitsinnut tikkuartorunnaartariaqarpugut. Politikkikkut suliassat eqqaamassavavut. Silaannaap salinneqarnissaa pisaraqarpoq, Upernaakkullu ataatsimiinnissaq aallartitsinnagu ajornartorsiummik ataatsimoorluta paasinnittariaqarpugut, Justus Hansen oqarpoq.

Inuusuttut eqqarsaatigineqassasut

Allanngortoqanngippat inuusuttut politikkimik sammisaqarusuttut ikilinissai ernummatigivaa.

- Inuusuttut politikkikkut nukissaqarluartut politikkerinngorissaat pingaaruteqarpoq, taakkumi Kalaallit Nunaata siunissaa immaqa pitsaanerusumik ingerlassinnaavaat, taanna oqarpoq.

Justus Hansenip erseqqissaatigaa politikkerit kitaani illoqarfinni anginerni najugaqartut ataqqisarilluinnarlugit.

- Tasiilami avinngarussimasumi toqqissisimanartumili inuuvunga. Illoqarfinni anginerusuni pissusilersuutit nammassinnaanerlugit takorlooruminaatsippara. Politikkerit pissusilersuutinik taama ittunik atugaqarlutik inuusut ataqqisupilussuuakka, Justus Hansen Kommuneqarfik Sermersuumi kommunalbestyrelsimut aamma qinigaasimasoq oqarpoq.

Powered by Labrador CMS