Politikkerit: Suleqatigiinnerup Dammarki nakkutiginnippallaartissanngilaa
Naalagaaffeqatigiinni suleqatigiinnerulertoqarpat imaanngilaq, nunat allamiut Kalaallit Nunaanni aningaasaliissteqarniarnerannut Danmarki nakkutiginnippallaassasoq, Kalaallit Nunaannit folketingimi ilaasortat marluullutik oqarput.
Ministeriunerup Mette Frederiksenip Folketingimi ammaaneriorluni oqalugiarernmini nunanut allanut tunngasutigut isumannaallisaanermullu politikkimi Naalagaaffeqatigiit suleqatigiinnerunissaat ujartorpaa.
Taamatut oqariartuuteqarnera Kalaallit Nunaanni folketingimi ilaasortat marluk tunngaviatigut isumaqatigaat, nangaanartoqartitsippulli.
AAMMA ATUARUK: Aammaanermi oqalugiaat: Mette F. Naalagaaffeqatigiinni suleqatigiinnerusoqarnissaanik kissaateqarpoq
Aki-Matilda Høegh-Damip (S) Aaja Chemnitz Larsenillu (IA) misissuisarnissaq pillugu inatsisissatut siunnersuummik Danmarkimi naalakkersuisut saqqummiussingajalernerat eqqumaffigivaat.
Naalagaaffeqatigiinni nunat allamiut aningaasaliissuteqartarnissaannik misissuisarnissaq attaveqaatinut pingaarutilinnut isumannaallisaanermilu politikkimut sunniuteqarsinnaavoq. Misissuisarnissarli pillugu inatsit Danmarkip nakkutiginninnerulernissamut utoqqatsissutigissanngilaa:
Misissuisarnissaq oqaluuserineqassasoq
- Suleqatigiinnerulernikkut nunanit allaneersut Kalaallit Nunaanni aningaasaliissuteqarniarnerannik Danmarki nakkutiginnittassappat, suleqatigiinnerulernertut oqaatigineqarsinnaanngilaq, nakkutiginnittassappammi Namminersornerullutik Oqartussaanerup atuutsinneqalernerata nalaanisut pissutsit ileqqissapput, Aki-Mathilda Høegh-Dam Sermitsiaq.AG-mut allakkatigut oqaaseqaateqarluni allappoq.
Aaja Chemnitz Larsen aamma taamatut nipilimmik oqarpoq:
- Misissuisarnissaq ukioq manna folketingimi oqaluuserineqartassaaq. Matumani pingaaruteqarpoq Kalaallit Nunaata pisariaqartitaasa eqqarsaatigineqartarnissaat.
Erseqqissumik nassuiaasiortoqartariaqartoq
- Kalaallit Nunaata pisariaqartilluinnangaanik nunat allamiut aningaasaliissuteqarnerisa aamma Kalaallit Nunaanni aningaasaliissuteqartut eqqortuunerisa akornanni oqimaaqatigiissitsinissaq matumani pineqarpoq, Aaja Chemnitz Larsen Sermitsiaq.AG-mut oqarpoq.
Aajap oqaatigaa, isumannaallisaanermi politikkip suunera aamma attaveqaatit pingaarutillit suunerisa ataatsimut nassuiaasiornissaat minnerpaamik pisariaqartoq, tassa Danmarkimi naalakkersuisut qanoq iliallallutillu misissuisassanngippata.
- Misissuisarnissaq uagutsinnut qulakkeerinnittussaavoq, Danmarkimili naalakkersuisut tamanna atorniarsinnaavaat oqarlutillu isumannaallisaanermi politikki pineqartoq, uagulli isumannaallisaanermi politikkimut attuumatinngikkipput, Aaja Chemnitz Larsen oqarpoq.