Politikkerit Kangerlussuarmut atatillugu akiligassarujussuarmut ikiorserneqarnissamik neriuuteqartut

Nuummi Ilulissanilu timmisartoqarfissat atorneqaalerpata, Kangerlussuarmi imarpikkoortaatinut mittarfik atuinnarneqassappat ukiut 53 millioner koruunit missaanniittunik Nunatta Karsia aningaasartuuteqartassaaq.

Naalakkersuisut naatsorsuisimanerisa tamanna takutippaat. Mittarfeqarfiit siunissaat pillugu inatsisissatut siunnersuummut naatsorsuutit ilaatinneqarput, taakkulu Inatsisartuni sapaatip-akunnerani matumani siullermeerlugit suliarineqarlutik, tassungalu atatillugu oqallinnermi ilaatigut Kangerlussuaq siunissami inuinnarnut mittarfittut atuutiinnassanersoq sammineqarluni.

Naleqqami siulittaasup Pele Brobergip ilaatigut naalakkersuisuutitaqartumut Siumumut apeqqutigaa, Kangerlussuarmi mittarfik ammatiinnarneqassappat Siumut qanoq aningaasassarsiorniarnersoq.

Siumumi oqaaseqartartup Doris J. Jensenip tassunga atatillugu oqaatigaa, Danmarkimi illersornissaqarfimmik immaqalu aamma USA-mik isumaqatiginninniarnerit suli neriuuteqarfigilluarneqartut:

- Sillimaniarnermut illersornissamullu isumaqatigiissutit aningaasaqarnermik pitsaanerulersitsisinnaasut

- Oqaatigineqartarpoq Kangerlussuarmik matusiniartugut. Tamanna ilumuunngilaq, taamaammat sillimaniarnermut atatillugu isumaqatiginninniarnerit nammassineqarnissaat sulissutigissavarput, politikkeri oqallittoqarnerani oqarpoq, tassani aamma amerikamiunit Kalaallit Nunaannik soqutiginnittoqartoq innersuussutigalugu.

Doris J. Jensenip oqaatigaa, sillimaniarnermut illersornissamullu atatillugit isumaqatigiissutit mittarfeqarnermi sinneqartooruteqarnissamik qulakkeerinneqataasinnaasut.

Kangerlussuup siunissaanut atatillugu Illersornissaqarfimmit 2.500 meteriusumik mittarfeqarnissaq kissaatigineqarpoq, sakkutuujunngitsunilli angallassisoqartassanersoq suli inissinneqarsimanngilaq. Kangerlussuarmi ilaatigut iluarsagassat Kangerlussuullu Timmisartoqarfittut ingerlatiinnarneqarnissaa pillugit suli isumaqatiginninniartoqarluni.

Isumaqatiginninniarnerit 2019-imi ukiakkulli aallartinneqarsimapput, taamanikkut Illersornissaqarfiup Kangerlussuarmik atuiinnarnissaa pillugu Naalakkersuisut Danmarkimilu naalakkersuisut tunngaviusumik isumaqatigissuteqarput.

Periutsit marluk: Imarpik ikaarlugu angallassineq angallassinnginnerlu

Mittarfeqarfiit siunissaat pillugu inatsisissatut siunnersuummi Mittarfeqarfinnut siunissami tapiissuteqartarnissami periarfissat marluk atorneqarsinnaapput.

Kangerlussuarmi mittarfik inuinnarnut timmisartunit Dash 8-nit angallanneqartunut atorneqartassappat, Mittarfeqarfiit timmisartoqarfinnik qulimiguulinnullu mittarfinnik ingerlatsinermut ukiumut 105 millioner koruuninik tapiiffigineqartassapput.

Imarpilli ikaarlugu angallassisarnermi atuinnarneqassappat, Miitarfeqarfiit ingerlatsinermut ukiumut 158 millioner koruuninik tapiiffigineqartassallutik.

Isumaqatiginninniarnerit nutaarsiissutigineqanngitsut - suli akitsuusiisoqarsinnaasoq

Attaveqaasersuutinut Naalakkersuisup Erik Jensenip (S) erseqqinnerusumik oqaatiginngilaa, Illersornissaqarfimmik isumaqatiginninniarnerit qanoq ingerlanersut, erseqqissaassutigaali siunnersuummi aningaasaqarneq pillugu naatsorsorneqarsimasut allannguuteqarsinnaasut:

- Saqqummiunneqartutuut arlariinnik periarfissaqarpoq, oqaatigineqartutullu Illersornissaqarfimmik isumaqatiginninniarneq tunngavigalugu kisitsisit allannguuteqarsinnaapput.

- Oqaloqatigiinnerit ingerlapput, tusarparpullu isumaqatiginninniarnerit piaartumik naammassineqarusuttut, Erik Jensen oqarpoq.

Saqqumiunneqartoq alla Mittarfeqarfinnut tapiissutissanut aningaasalersuisussatut naatsorsuutigineqartoq tassaavoq, timmisartunut ilaanerit tamarmik akitsuuserneqarnissaat. Siunnersuummut nassuiaammi allassimasut naapertorlugit, Naalakkersuisut taamatut akitsuusiinermi iluaqutaasinnaasunik ajoqutaasinnaasunillu misissuipput.