Politikkerit fabrikimik akuerisaanngitsumik pisiaqarnissaq pillugu: Akuerisariaqarsimavarput
Fabrikimik pisiaqarnissamut, borgmesterimit taamaallaat akuerineqarsimasumut 14 millioner koruunit immikkoortinneqarput. Kommuneqarfik Sermersuumi kommunalbestyrelsimi amerlanerussuteqartut marlunngornermi tamanna aalajangiiffigaat.
Suliaq borgmesterimik Charlotte Ludvigsenimik tunuartitsisariaqalersimasoq, kommunalbestyrelsip ataatsimiinnerani, borgmesterissamik nutaanik toqqaaffiusumi marlunngornermi suliarineqarpoq.
Suliaq pineqartoq tassaavoq, kommunip asfaltiliorfimmik timmisartoqarfiliortunit Munck Gruppenimit pisiaqarnissaanut tunngasoq.
Kommunimi aqutsisoqarsimaneranik torersaanermi paasineqarsimavoq, 20,9 millioner koruuninik nalilimmik pisiaqarnissaq borgmesterimit kiisalu kommunimi pisortaanerusimasumit Lars Møller-Sørensenimit taamaallaat akuerineqarsimavoq.
Pisiaqarnissaq akuerineqarsimanngilaq imaluunniit aningaasaqarnermut ataatsimiititami kommaunalbestyrelsimiluunniit missingersuusiorneqarsimanngilaq. Borgmesterilli kommunimilu pisortaanerusimasup atsiorsimanerat isumaqatigiissummut pituttuisimavoq, taamaammat politikkerit marlunngornermi siusinnerusukkut misigisimanngisaminnik inissisimalersimapput - tassalu borgmesterip kommunimilu pisortaanerusimasup isumaqatigiissutigisimasaannik akuersinissaq minnerunngitsumillu aningaasaliiinissaq.
Iluaqutissartai erseqqissaassutigisimagai
Suliap suliarineqarneranut atatillugu Charlotte Ludvigsenip erseqqissaassutigisimavaa, fabrikimik pisiaqarnissaq kommunimut aningaasatigut iluaqutaassasoq. Qiimmaallannarsinnaasumik taamatut nalunaaruteqaraluartoq kommunimi politikkerit allat ilungersorpaluttumik kiinaqarsimapput.
Ilaatigut Ludvigsenip parteeqataa Juaaka Lyberth, kommunalbestyrelsimi IA-p gruppiani siulittaasoq taamatut kiinneqqasimavoq.
- Siunertaq pitsaagaluartorluunniit takoreerparput kukkusoqarsimasoq, tassami tamanna politikkikkut akuersissutigineqarsimanngilaq, Lyberth ilaatigut suliaq pissutigalugu borgmesterip tunuarnissaminik aalajangersimaneranik tusaatissatut tigusisimasoq erseqqissaassuteqarpoq.
Taasuma suliaq ilungersunarnerarpaa:
- Suliaq ajuusaarnarluinnartoq
- Pisimasoq ajuusaarnarlunilu ilungersunarpoq, pisimasorlu peqqinngisaannassaaq, Lyberth oqarpoq. Ilanngullugu oqaatigaa, fabrikimik pisiaqarnissamut kommunip karsianit 14 millioner koruuninik tigusinissamut IA Nalerarlu akuersisariaqarsimasut.
Demokraatinit aamma oqaatigineqarpoq, kommuni pituttuisumik isumaqatigiissuteqareersimammat akuersisariaqarsimallutik:
- Tamanna uterfigeqqinnianngilara. Suliaq ajuusaarnarluinnartuuvoq. Ukioq manna ilassutitut aningaasaliissutigineqarniartut 2,5 millioner koruunit, aappaagulu missingersuutissanit 11,3 millioner koruunit immikkoortinneqarnissaat akuerivagut, Justus Hansen oqarpoq.
Kommunilli ingerlatsivianit inassuteqaat erseqqissuuvoq:
- Kommuni 31. marsi 2020-mi pisinissamut isumaqatigiissusiorsimammat Suliffeqarfimmi Kiffartuussiuviup ilassutitut aningaasaliissutit akuersissutigineqarnissaat innersuussutigivaa, akuersissuteqarnikkummi kommuni pisussaaffimminut qulakkeerinnissinnaaniassammat, kommunalbestyrelsimut inassuteqaammi allassimavoq.
Borgmesteriujunnaartumut tusangiasaarut
Kommunalbestyrelsimili Siumut sinnerlugu ilaasortat inassuteqaatinut akuerserusussimanngillat.
- Oqaatigisimasavut attatiinnarpagut. Erseqqissaassutigissavarput malittarisassat atuuttut avaqqunneqarsinnaanngimmata, Siumumi politikkeri Dorthe-Marie Mogensen-Fontain oqarpoq.
Taamma aamma borgmesterimut Charlotte Ludvigsenimut isornartorsiuivoq:
- Politikkikkut sulinermut akornusersuisugut oqaatiginikuuarsi. Tamanna akuersaarsinnaanngilarput. Pissusiviusut maanna saqqummeralerput, Mogensen-Fontain Siumut kommunalbestyrelsimi sulinermut akornusersuinerarlugu siusinnerusukkut borgmesterip oqaaseqarsimanera innersuussutigalugu oqarpoq.
Borgmesteri atorfilittanit ilaginnarneqarsimasutut misigisimasoq
Asfaltiliorfik pillugu oqaluuserisassap oqaluuserineqarsimatsiarnerata kingorna Charlote Ludvigsenip tunuarnissamik qinnuteqaataa kommunalbestyrelsimi suliarineqarpoq.
Charlotte Ludvigsenip innersuussutigisimavaa, kommunip aningaasatigut pisussaaffiinik miliuunilikkaanik nalilinnik aappassaanik akuersissuteqarsimanini, tassa pineqartut politikkikkut akueriteqqarnagit suliarineqarsimaneri innersuussutigalugit.
Charlotte Ludvigsenip oqaatigisimavaa kommunimi pisortaanerusimasumit ilaginnarneqarsimasutut misigisimalluni:
- Nassuerutigisariaqarpara, pitsaasumik unneqqarissumillu siunnersorneqartarnissaq pingaaruteqartoq, kingusinaartumillu uggornaraluaqisumik nassuerutigisariaqarlugu tamanna kommunimi pisortaanerusimasumit amigaatigisimallugu.