Politikkerit attortissimaqisut: Qulaajaaneq 2024-mi naammassineqarsimassasoq neriorsuutigineqartoq
Spiralilersuisimanerup arlaannaannulluunniit attuumassuteqanngitsumit qulaajaaffigineqarnissaa aallartinneqassasoq aamma suliakkiissutissaq nassuiaammullu aningaasaliissutissat piaarnerpaamik inissinneqassasut, Peqqissutsimut Naalakkersuisoq Danmarkimilu sundhedsministeri tusagassiortunik katersortitsinermi ilisimatitsipput.
Peqqissutsimut Naalakkersuisoq Mimi Karlsen (IA) aamma Danmarkimi sundhedsministeri Magnus Heunicke arnat spiralilersorneqarsimasut arlallit ataatsimeeqatigereerlugit danskillu periusissiarisimasaannik, Kalaallit Nunaanni "ilaqutarinnut atatillugu pilersaarut", misissuinissamut pilersaarut pillugu ataatsimeereerlutik tallimanngornermi unnukkut tusagassiortunik katersortitsipput.
Magnus Heunickep allarniilluni oqaluttuaraa, marluullutik ulluni kingullerni arnat aqqaneq-marluk, inuusuttunnguullutik spiralilerneqarsimanerminnit kingunerlutsitsingaatsiarsimasut ataatsimeeqatigisimallugit:
- Ataatsimeeqatigiinnitsinni marluulluta attorteqaagut, arnat inuusuttunnguit qanoq pineqarsimanerat ullumikkut isiginnittaaseq malillugu paasiuminaattupilussuuvoq, Magnus Heunicke arnanik ataatsimeeqateqarsimaneq pillugu oqarpoq.
Mimi Karlsenip Magnus Heunickellu tusagassiortunik katersortitsinermi ilisimatitsissutitgaat, Danmarkimi Kalaallillu Nunaanni naalakkersuisut isumaqatigiissutigisimagaat, spiralilersuisoqarsimaerata arlaannaannulluunniit attuumassuteqanngitsumit qulaajaaffigineqarnissaanik Inatsisartut kissaataat malinniarlugu, qulaajaanissamullu pingaarnertut sinaakkutissat ulluni kingullerni isumaqatigiissutigineqarsimasut.
Spiralilersuisimanermik misissuineq, Kalaallit Nunaata Danmarkillu akornanni sorsunnersuup aappaanit ullumimut oqaluttuarisaanermi qanoq peqatigiissimanerat pillugu nassuiaasiortoqarneranut atatinnagu immikkut ingerlanneqassaaq. Tamanna aamma Naalakkersuisut Siulittaasuata Múte B. Egedep ministeriunerullu Mette Frederiksenip ataatsimoorussamik nalunaarummi juunip qulingiluaani atsiorsimasaanni atuarneqarsinnaavoqi.
Pilersaarut aningaasartassallu septembarimi piareersimassasut
Septembarimi suliakkiissut piareereersimassaaq aningaasaliissutissallu immikkoortinneqareersimassallutik, maannalu isumaqatigiissutaareerpoq, spiralilersuisimanermik misissuineq 2024 naatinnagu naammassineqareersimassasoq.
- Arnat pineqartut taakkulu ilaqutaat eqqarsaatigalugit aamma sulinerup ammasumik ingerlanneqarnissaa qulakkeerniarlugu ilisimatitsissutissanik suliaqartuartassaaq, sulinerup qanoq ingerlanera ilisimatitsissutigisarlugu, Peqqissutsimut Naalakkersuisoq Mimi Karlsen spiralilersuisimanermik misissuisimaneq pillugu ilisimatitsivoq.
Naalakkersuisumit arlaleriarluni erseqqissaassutigineqarpoq, suliap ingerlanneqarnerata sivitsuutinnginnissaa pingaaruteqartoq, ukiullu marluk iluini angusaqartoqassasoq.
Spiralilersuisimaneq pillugu suliaqarnermi, Danmarkimi naalakkersuisut naartunaveersaartitsinermut periusissiaata ilaatut, arnat 13-iniik qummut ukiullit 4.500-t missaanniittut 1966-imiit 1975-imut angajoqqaavi akuersiteqqaarnagit spiralilersorneqarsimanerat tunngaviuvoq.
Spiralilersuisimanermik qulaajaaneq Inatsisartunit kissaatigineqartoq malillugu ilisimasalinnit ilisimatuunillu Kalaallit Nunaanneersunit Danmarkimeersunillu ingerlanneqassaaq. Danmarkimi Sundhedministeeriaqarfik Kalaallillu Nunaanni Peqqissutsimut Naalakkersuisoqarfik allattoqarfittut sulinermut tapersiissapput.
Læs hele sagen:
- Staten tog min mødom
- Spiral-kampagne var folkemord
- Uhyggelig og skamfuld
- Svært for regeringen at komme udenom spiral-sagen
- Vi må afdække krænkelser af menneskerettigheder
- Naalakkersuisut tager afstand fra Spiralkampagnen
- Grønland bør selv stå for efterforskningen af spiral-sag
- Start arbejdet med at udrede spiralkampagnen
- Spiralilersuisarsimaneq pillugu nassuiaasoqarnissaanik suliaq aallartilli
- Inatsisartut ønsker undersøgelse af spiralsag
