Politi: Killilersuuteqaraluartoq suli ulapingaatsiartut
Politiit sapaatip akunnerata naanerani unnummi siullermi ulapingaatsiarsimapput. Nuummi killilersuisoqarnera pissutigalugu imerniartarfinni eqqissiviilliortoqanngilaq, angerlarsimaffinnili eqqissiviilliortoqarnerulluni.
Kalaallit Nunaata Politiivi arfininngornerup unnuaani ulapingaatsiarsimapput.
Angerlarsimaffimmi eqqissiviilliortitsisoqarneranik nalunaarutit ilaat, politiit orniguffigisaat, aserorterisoqarneranik siorasaarisoqarneranillu kinguneqarput. Angut siorasaarisoq politiinit tigusarineqarpoq, siorasaarinermullu tunngatillugu ullumi unnerluunneqassalluni.
Politiini pigaartut pisortaat Søren Bendtsen Sermitsiaq.AG-mut taama oqaluttuarpoq.
- Takunnittunut pisoq sakkortusinnaassaaq tigusarinninnerummi nalaani politiit amerlangaatsiarmata. Angerlarsimaffimmi eqqissiviilliortitsisoq aserorterilersimavoq siorasaarilerlunilu, silamilu aamma eqqissiviilliortitsilluni. Pineqartoq ilaatigut siorasaarisimasutut unnerluunneqassaaq, Sermitsiaq.AG-mut oqarpoq.
Ajornartorsiutit angerlarsimaffimmut nuuttartut
Nuummi maannakkut killilersuisoqarpoq. Taamaammat imerniartarfiit killeqartumik isersimasiqarsinnaapput matoqqaannarlutilluunniit.
Politiit misilittagarilersimavaat katersuussinnaasut killeqarnerini ajornartorsiutit angerlarsimaffimmut nuuttarneri.
- Taama maleruagassaqartillugu angerlarsimaffinni ajornartorsiutit malunnarnerusarput, soorlu erngunnermi, angerlarsimaffimmi eqqissiviilliortitsisoqalersarpoq. Tamanna soorunami ilaqutariinnut ajorluinnartarpoq, unnummulli pisut amerlanerpaartaat sakkortunngillat, Søren Bendtsen oqarpoq.
Politiit suli saaffigineqanngitsut
Kalaallit Nunaata Politiivi 8. november angerlarsimaffimmi ujajaasoqarsimaneranik takunnissimasinnaasunik ilisimannittunilluunniit ujartuillutik ippassaq nalunaaruteqarput. Maannamulli suliamut tunngatillugu suli saaffiginnittoqanngilaq.
- Inuit ujajaanermik takunnissimasinnaasut ilisimannittulluunniit oqaloqatiginissaat soqutigilluinnarparput. Ujajaaffigitittup taama pisoqarsinnaanera assorsuaq tupaqqassutigaa, Kalaallit Politiivini pigaartut pisortaat oqarpoq.
Ujajaasoqarsimaneranut tunngatillugu ilisimannittut politiinut, oqarasuaat 701448, attaveqaqquneqarput.