Politikikkut akisussaaffiliiniarneq itigartitsissutigineqarpoq

Takuuk: Ilanngutassiaq Inga Dora G. Markussenip siunnersuutaanut atatillugu Demokraatit isumaannik Justus Hansenip itisiliilluni oqaaseqarneratigut iluarsineqarpoq. Justus Hansenip ilanngullugu erseqqissaassutigaa, partii Charlotte Ludvigsenimut suli tapersersuinngitsoq.

Kommuneqarfik Sermersuumi kommunalbestyrelsi tallimanngormat immikkut ittumik ataatsimiippoq, tassani ineqarneq pillug suliaq oqaluuserineqarluni.

Ineqarneq pillugu suliap ilisimatitsissutigineqarnerata saniatigut, Siumumeersoq Inga Dora G. Markussen oqaluuserisassamik saqqummiussisimavoq. Ineqarneq pillugu suliaq borgmesterip politikkikkut akisussaaffiatut inissinneqassasoq siunnersuutigisimavaa.

Siumut tunngviatigut isumaqarpoq, borgmesteri suliaq pissutigalugu tunuartariaqartoq, borgmesterili tunualersaanngilaq. Borgmesteri Charlotte Ludvigsen aamma eqqissiallassinnaanngorsimavoq, siunnersuut kommunalbestyrelsimi IA-mit Naleqqamit Demokraatinillu itigartinneqarmat.

Itigartitsineq Siumumi politikkerimit uggorineqarpoq:

- Suliami matumani ineqarnermut politikkip ingerlanneqarsimaneranut akisussaaffimmik inissiisoqartariaqarpoq. Siunnersuutimmalu kommunalbestyrelsimi oqaluuserineqannginnera uggoraara. Erseqqissumik kinguneqartitsoqartariaqartoq isumaqarpunga, tusaasinnaasakkalu malillugit kinguneqartitsisoqarsinnaanera akuersaarneqanngilaq, Inga-Dora G. Markussen ataatsimeeqatigiinnermi oqarpoq.

Borgmesteri: Kinguneqartitsisoqarnianngilaq

Borgmesterip Charlotte Ludvigsenip oqaatigaa, siunnersuut kommunalbestyrelsip suliassaasa avataaniittoq, taamaammallu itigartitsissutigineqarnera eqqortuusoq:

- Kommunalbestyrelsip pisuutitsinissaq suliassarinngilaa. Nakkutilliisut tamanna suliassaraat, taakkulu ilisimatitsissutigisimavaat kommunalbestyrelsimi ilaasortanut kinguneqartitsinissamik eqqarsaateqarsimanatik, Charlotte Ludvigsen Sermitsiaq.AG-mut oqarpoq.

Borgmesterip itisiliilluni oqaatigaa, kommuni februaarip arfineq-aappaani Namminersorlutik Oqartussat Nakkutilliisoqarfianit mailikkut allagarsisimasoq, Nakkutilliisut tassani ilisimatitsissutigisimavaat, suliaq Namminersorlutik Oqartussani naalakkersuisoqarfinnut suliamut attuumassuteqartunut ingerlateqqinneqarsimammat iliuuseqaqqinniaratik. Kommuneqarfik Sermersuulli immikkut ittumik nakkutilliinermik aallartitsisimanera Nakkutilliisut nutaanik suliaqartilersinnaavaat.

Tallimanngormat ataatsimiittoqarnerani IA-meersup Avaara Olsenip oqaatigaa, borgmesteri kommunalbestyrelsip aalajangiussimasai malinnagit iliuuseqaqattaassappat borgmesterip tunuarnissannik kommunalbestyrelsi piumasaqarsinnaasoq. Suliamulli aalajangersimasumut matumunnga atatillugu borgmesterip tunuaqquneqarnissaanut tunngavissaqarnersoq IA-mit takuneqarsinnaasimanngilaq.

Demokraatit borgmesterimut suli tapersersuinngitsut

Naleqqameersoq Finn Karlsen borgmesterimut aamma tapersersuivoq:

- Siulitta suliami matumani qanoq iliuuseqarsimanerat pillugu oqallinnerput unitsittariaqarparput. Nakkutilliisunit peqqussutinik isornartorsiutinillu tigusaqarsimavugut, Kommuneqarfik Sermersuumilu siunissami inissaqartitsinissaq qulakkeerniarlugu aaqqiissutissarsiorlunga sulerusunneruvunga. Sulimi kommunitsinni inissarsiortoqaqaaq, Nuummiinnaanngitsoq, Finn Karlsen ataatsimiinnermi oqarpoq.

Kommunalbestyrelsi sinnerlugu Demokraatit ilaasortaatitasa Charlotte Ludvigsenip tunuarnissaa siusinnerusukkut piumasarisimavaat, kommunalbestyrelsimilu IA-mik Naleqqamillu suleqateqarnerminnit tunuarsimallutik. Demokraatilli siunnersuut itigatitsissutiginiarlugu taaseqataasimapput.

Justus Hansenip Sermitsiaq.AG-mut oqaatigaa, partiimit Charlotte Ludvigsen borgmersteritut suli tapersersorneqanngitsoq, siunnersuummulli akerliliineq borgmesterimut tapersiinertut isigineqassanngitsoq.

- Inatsisartutulli kommunalbestyrelsimi tatiginnikkunnaartutut taasisinnaanngilagut. Charlotte Ludvigsen borgmesteritut tapersersunngilarput, Inga Dora G. Markussenilli oqaluuserisassanngortitaanut isummersimavugut, Justus Hansen oqarpoq, erseqqissaassutigalugulu:

- Efter temadagen torsdag, hvor embedsværket fremlagde alle bilag og begrundelser for afgørelsen, står vi i Demokraatit med endnu flere spørgsmål end før.

- Atorfilittat sisamanngornermi sammisaqartitsigamik bilagit aalajangiisimanermullu tunngavilersuutit tamaasa saqqummiummatikkit Demokraatini siusinnerusumut sanilliullugu amerlanerusunik apeqqutissaqalersimasut.

Siumut ajoqusersuineraraa

Kommuneqarfik Sermersooq kommunip inissianik attartortitsisarneranut atatillugu Kommunit Nakkutilliisoqarfianit peqqussutinik isornartorsiutinillu katillugit 14-inik tigusaqarsimavoq.

Charlotte Ludvigsenip tallimanngormat tusagassiorfinnut nalunaaruteqarnermini, Siumut kommunalbestyrelsimi suliaqartoqarneranut atatillugu sakkortuumik isornartorsiorpaa. Bogemsteri isumaqarami, kommunimi politikkikkut suliaqartoqarnerani ineqarnermut suliamik saqqummiussiuarnermigut ajoqusersuisoq.

- Isumaqarpunga ingerlaqqittariaqartugut. Qaamatit kingulliit ilungersunarsimapput, immitsinnummi isornartorsiortarluta nukippassuit atorsimavagut, Charlotte Ludvigsen oqarpoq.

Inga Dora: Poortuiniarsarisoqartoq misigisimavunga

Inga Dora G. Markussen akerlianik isumaqarpoq, at borgmesteri suliamut atatillugu poortuiniarsarisoq:

- Pisut makku oqaluuserinissaannut pisinnaatitaaffeqarpugut, oqaluuserineqarusunngillalli. Misinnarpoq suliaq poortorniarneqartoq, taanna oqarpoq.

Taassuma ilanngullugu oqaatigaa, amerlanerussuteqartut borgmesterimik tapersersuinerat Siumumit ataqqineqartoq. Siumumili politikkeri naapertorlugu, suliaq suli naammassineqavinngilaq:

- Periuserineqarsimasup maanna siunissamilu kommunip aningaasaqarneranut qanoq kinguneqarsinnaanera suli paasiniarparput. Innuttaasut tamatumannga paasitinneqartussaapput. Tamatuma saniatigut attartornermi isumaqatigiissutit atorunnaarpata susoqassanersoq aamma paaserusupparput, Inga Dora G. Markussen oqarpoq.

Borgmesterip maannamut oqaatigisarpaa, attartortut 400-t missaanniittut ineqarnermut akiliutigisartagaat qaffanneqarnianngitsut.