Politikerit: Naasunnguaq aamma Rikke nersugassaapput

Kommuneqarfik Sermersuumi kommunalbestyrelsimi ilaasortat Naasunnguaq Ignatiussen Streymoyimut aamma Rikke Blegvadimut nersuiniarput.

Tasiilami kinguaassiuutitigut atornerluisarnernut meeqqanullu sumiginnaanernut akiuinertik piviusulersaarusiami 'Byen hvor børn forsvinder'-imi takutippaat.

- Rikke Blegvad aamma Naasunnguaq Ignatiussen Streymoy Nunatsinni paquminarluinnartut ilaannik oqallitsitsilernerannut nersualaarusuppavut. Kinguaassiutitigut kannguttaatsuliornerup akuerisassaannginneranik imminullu toquttarnerup aningorniartariaqarneranik takutitsivusi, Charlotte Ludvigsen (IA), Peter Davidsen (S), Justus Hansen (D) aamma Michael Rosing (Sam) allapput.

- Meeqqat inuusuttullu toqqissisimallutik peroriartorniassammata tamatta peqatigiilluta nunarsuaq inuuffigiuminarnerulersissavarput. Kommuneqarfik Sermersuumit najukkanilu qinigaasugut Tasiilaq pingaartittorujussuarput. Suliassanik ingerlatsinerlussimaneq nassuerutigissavarput, ajornartorsiutinilli tusaangitsuusaarneq ajorpugut sapinngisarpullu tamaat aaqqiissutissanik ujartuisarluta, politikerit neriorsuipput.

Piviusulersaarut aalassannartoq
Piviusulersaarut Naalakkersuisut ilumoorullugu tigugaat Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen oqarpoq.

- Piviusulersaarut aalassatsitseqaaq, isumaqarpungalu suut tamaasa aqqutigalugit meeqqat taamaa inuuneqarnissaat pitsaaliussagipput. Taamaattoqarnera akuerisinnaanngilluinnarparput. Meerartatsinnut atugassarititaasut pitsanngorsarneqarnissaat tamatta akisussaaffigivarput. Inuiaqatigiiffigisatsinni pissutsit iluatsissappata, taava ataatsimoorluta kivitseqataasariaqarpugut. Isumaginninnermi suliaqarnermi nunami politikkerit inatsisiliornernut sinaakkusersuinernullu akisussaasuupput. Ulluinnarni inatsisit malinneqarnissaat kommunit akisussaaffigivaat. Inuilli pissusilersuutiminnik allanngortitsinissamut nunaqarfimminni illoqarfimminnilu ikiuunnissaminnullu aammattaaq akisussaaffeqarput, tusagassiutinut nalunaarummi Martha Abelsen oqarpoq.

Naak kinguaassiuutitigut atornerluinerit malunnaatilimmik appariarsimagaluartut, suli eqqugaasut amerlapput aamma ikiorneqarnissamik pisariaqartitsisut amerlapput, naalakkersuisoq oqarpoq.

- Tasiilamitut isumaginninnermi unammilligassat aaqqiivigissagutsigit, oqartussaasoqarfiit assigiinngitsunik suliallit akornanni tamatta ataatsimoorluta kivitseqataasariaqarpugut. Inuiaqatigiinnitsinni allanngortitsinissaq tamatta ataatsimoorluta akisussaaffigivarput. Isumaginninnermi ajornartorsiutigut qiviarsinnaasariaqarpagut, oqallisigalugit aamma iliuuseqarnissamut piareersimaffigalugit. Politikeriusugut iliuuseqartariaqarpugut akisussaaffimmillu tigusilluta. Tamanna aamma angajoqqaanut inuiaqatigiinnilu innuttaasunut atuuppoq.

Pisariaqartitsineq

Ukiuni qulini Kommuneqarfik Sermersuup piunerani meeqqanut inuuniarnermikkut ajornartorsiuteqartunut aningaasaliissutissanik itigartitsinngisaannarnikuullutik Sermersuumi kommunalbestyrelsimi oqarput. Aamma suliassaqarfinni allani sipaarniarnernik amigartoornernilluunniit naleqaraluarpat.

2017-imi Kommunalbestyrelse isumaqatigiittoq Meeqqanut Ilaqutariinnullu Ingerlatsivik nutaaq pilersippaa, suliassaqarfimmi pisariaqartitsinerup matussusernissaa qulakkeerniarlugu.

- Sulisinnaasunilli suli amigaateqarpugut. Allannguinissanik amerlanernik pisariaqartitsivugut. Tasiilami annertuumik suliniuteqarpugut sunniutaalu aatsaat kingusinnerusukkut takuneqarsinnaalissapput.

- Tasiilaq eqqaalu pingaartittuarpavut. Aaqqiissutissanillu periarfissarsiortuarpugut. Sunali tamaat kisitta iliuuseqarfigisinnaanngilarput. Tamattaalluta akiueqatigiittariaqarpugut aaqqiissutissanillu siunnersuisoqarusuppat innuttaasui tusaassavavut, oqarput.