Ullumikkut nunatsinni timersortartut amerlanerpaat feriassatik atorlugit aammalu akissarsiaqaratik sulinngiffeqarlutik timersornermut aaqqissuussani peqataasarput, soorlu assersuutigalugu nunatsinni pissartanngorniunnerni annaasaqarlutik peqataasarlutik.

- Timersortartut ilaat aaqqissuussanut peqataaniarunik toqqaasariaqalertarput sulissanerlutik imaluunniit sulinngitsuussanerlutik, ilinniartullu timersortartut nalunaarsorneqartarput atuanngitsoortutut. 

- Pissutsit ullumikkutut itsillugit, timersortartortatsinnut tapersersuineq timitaqanngilaq, taamaallaat unammillutik ajugaagaangata assaat pattallugit ajugaanerallu tanngassimaarutigalugu tapersersuineq ersersinneqartarpoq, massa illuatungaani timersortartut annertoorujussuarmik pilliuteqartartut. Isumaqarpunga tamanna pissusissamisuunngitsoq, Kommune Qeqertalimmi kommunalbestyrelsimi ilaasortaq, Aqqa Samuelsen (S) tikkuaavoq nangillunilu:

- Timersorneq inuiaqatigiittut qanoq paasisarnerlutigu nalilersoqqittariaqarparput, piffissanngorporlu timersortartortatta timersornertik pissutigalugu isertitaminnik feriassaminnillu annaasaqartarnerat unitsissallugu. Innuttaasut peqqissusaat pingaarnersiuinermi sallinngortinneqartariaqalerpoq aammalu inuunerissaarnissamut, peqqinnerulernissamullu aqqutissiuussisut kaammattorlugillu tapersersornerusariaqarpagut, Aqqa Samuelsen nassuiaavoq.

Akisussaaq illuatungaanili aamma sipaarnassaaq

Aqqa Samuelsen kisitsisitaliisinnaanngilaq timersortartut inuiaqatigiinni sullissinertut ittumik aaqqissuussiffigineqassappata, tassa annaasaqaratik timersornermik ingerlatsisinnaassappata, taamaattorli taanna naliliivoq naggataatigut inuiaqatigiit aningaasarpassuarnik sipaarsinnaasut:

- Nalunngilara matumani anguniagaq akisusinnaasoq, pingaartumik timersornermi aaqqissuussanut ulluni arlalinni ingerlanneqartussanut peqataasoqassatillugu. Illuatungaanili qularutiginngilluinnarpara, inuiaqatigiittut annertuumik sipaarsinnaasugut aammalu innuttaasut ataatsimut isigalugu peqqinnerulernissaannik aaqqissuussineq aaqqutissiuusseqataasinnaasoq, Aqqa Samuelsen oqarpoq.

Taanna aamma isumaqarpoq tapersersuineq taamatut timitalersugaq timersornerulernissamik immini kaammattuutaassasoq taassumalu ilutigisaanik inuiaqatigiit pinaveersaartitsinermut pinerluttaalisitsinermullu aningaasarpassuit atortagaat ikilisinneqarsinnaasut, kiisalu aamma minnerunngitsumik innuttaasut peqqinnissaqarfimmit kiffartuunneqartariaqarnerat annikillisarneqarsinnaasoq innuttaasut peqqissusaat qaffakkiartortillugu.

- Tamannaannaanngilarli, tassami timersornerup qanoq annertutigisumik pinaveersaartitseqataanera isiginiarneqarnerusariaqarpoq. Taamaammat isumaqarluinnarpunga timersornermut timitalimmik taamatut tapersersuineq sutigut tamatigut inuiaqatigiinnut iluaqutissiissasoq, Aqqa Samuelsen Sermitsiaq.AG-mut nassuiaavoq.

"Aalasa pillugu anguniagaq tamaviaarunneqarneruli"

Kalaallit Nunaat pisortatigoortumik 2030-ip nallernissaata tungaanut anguniagaqarpoq - "Nunarsuarmi timimik aalatitsinerpaaq", tassa nunatsinni innuttasugut tamatta timitsinnik aallatitsilluarnitsigut nunarsuarmi aalanerpaanngussasugut. 

Aqqa Samuelsen anguniakkamut innersuussivoq timersortartunut aningaasatigut feriassatigullu annaasaqannginnissaannik timitalimmik tapersersuinissamik siunnersuuteqarnermini:

- Pissanganartorujussuarmik anguniagaqarpugut, ullunilu makkunani nunatsinni pisortatigoortumik anguniakkat pillugit qanoq siuarsaasoqarsinnaanera isumaqatigiinniutigineqaleruttorpoq. Matumanilu isumaqarpunga angusaqarnerungaassasugut timitalimmik iliuuseqarutta, tamannami aqqutigalugu suliniutip Aalasap peqataaffiginissaanut innuttaasunut kaammattuineq kimeqarnerungaassaaq, Aqqa Samuelsen Sermitsiaq.AG-mut oqarpoq.

Taanna erseqqissaavoq kommunip iliuuserisinnaasai eqqarsaatigalugit nammineq siunnersuuteqarniarluni tigussaasumik kommunip iliuuserisinnaasaanik imalimmik, tamannalu aqqutigalug timersortartut, sungiusaasut aammalu dommerit tigussaasumik aaqqissuussiffigineqarnissaat aqqutississuukkusuppaa qulakkeerniarlugu aaqqissuussanni annaasaqaratik peqataasinnaanngorlugit, assersutigiinnarlugu nunatsinni pissartanngorniunnerni annaasaqaratik peqataasinnaanngorlugit.