Politikeri: Taama pisoqartussaanngikkaluarpoq

Peqqinnissaqarfik piginnaasanillu nalilersuisartut suleqatigiinnerat nukittorsarneqartariaqarpoq, utoqqaat piginnaasaannik nalilersuineq pitsaaneruleqqullugu. Suliami uani kukkusoqarsimassasoq isumaqarpunga, tamannalu ernumanartorujussuartut nalilerpara, politikeri oqarpoq.

Arnaq utoqqaq 92-inik ukiulik pitsorluttoq, isigiarsuttoq tutsarluttorlu utoqqaat illuannit qasuersaartarfimmit angerlartinneqarsimanera akuersaarneqarsinnaanngilaq.

- Isumaqarpunga ernumanarluinnartuusoq utoqqaq napparsimasoq, pitsorluttorlu angerlartiinnarneqarsimammat. Isumaqarpunga pisinnaasai pisariaqartitaalu nalilersorneqarmata kukkusoqarsimasoq. Utoqqartagut taama pisarniarutsigit, maani nunatsinni utoqqalilernissaq ernumanaallak, Kommuneqarfik Semersuumi kommunalbestyrelsemi ilaasortaq, Peter Davidsen (S) Sermitsiaq.AG-mut oqarpoq.

Arnap 92-inik ukiullip utoqqaat illuanni qasuersaarfimmit pingasunngornermi 18. januar angerlartinneqarnera pillugu taanna oqaaseqarpoq. Arnaq pineqartoq pisinnaajunnaalernini pillugu ulloq unnuarlu paaqqutarineqarnissamik kissaateqarsimagaluarpoq. Sermitsiaq.AG-llu allaaserisaa saqqummersimatsiartoq, 92-inik ukiulik Vilhelmine Lorentzen ilisimatinneqarpoq ullumi ataasinngornermi 23. januar qasuersaarfiusumut uteqqissasoq.

Piginnaasanik nalilersueriaatsit misissortariaqarpagut

Arnaq 92-inik ukiulik suli angerlartitaanngitsorli nalilersuisoqarsimanera pillugu Peter Davidsenip borgmester Avaaraq S. Olsen aamma isumaginninnermut ataatsimiititaliami siulittaasoq Inge Olsvig Brandt misissueqqullugit nalilersueqqeqqullugillu inassuteqarsimavoq. Borgmesteri aamma isumaginninnermut ataatsimiititaliami siulittaasoq suliamut tunngatillugu oqaaseqassanatik Sermitsiaq.AG-mut ilisimatitsipput, suliaq inunnut ataasiakkaanut tunngassuteqarmat.

Kommuneqarfik Sermersooq ilisimatitsivoq piginnaasanik nalilersuinermi peqqinnissaqarfimmit peqqissutsimut nalilersuinerit ilanngunneqartartut.

- Qaqugukkut taava ikiuusersuinerit annertunerulissangamik, utoqqaq isigiarsuttoq, napparsimasoq, tutsarluttoq pitsorluttorlu utoqqaat illuaniittussaanngitsutut nalilerneqarpat? Peqqinnissaqarfiup kommunillu naliliisarnermi suleqatigiinnerat annertusartariaqarpoq, utoqqartagut ikiorluarneruniassagatsigit, Peter Davidsen oqarpoq nangillunilu:

- Naliliinermi piumasaqaatit naammassineqartussat misissortariaqarpagut, annertunerpaamik ikiorneqarnissamik pisariaqartitsisut arajutsisassanngikkutsigit. Utoqqaat amerlaneruleriartorput, tunniussinnaasagullu aamma ajunngittariaqarput, Peter Davidsen oqarpoq.

Utoqqaat amerlaneruleriartortillugit utoqqaat illuanni inissat amerlineqarnissaannut suliniartoqassanersoq politikkikkut naliliisoqartariaqartoq, taanna aamma isumaqarpoq. Utoqqarnullu ikiuutit pitsaassusaat, nalilersuinermilu pisariaqartitsinerpaanik ikiuunnerusinnaanermut qulakkeerinnissutissat aamma nalilersorneqartariaqarsorai.

- Utoqqarnut politikkeqarutta inuunerup pitsaasuunissaanik qulakkeerinnittumik, aamma malitseqartunik tunniussaqarsinnaasariaqarpugut qulakkeerinnilluta. Utoqqartagut ukiuni taamannani sulereersimasut isumassorsinnaasariaqarpagut utoqqalippata, Peter Davidsen oqarpoq.

Powered by Labrador CMS