Politikerit Tunumi saarullittassiissutit sinnerujussuarneqarnissaat akuersaaraat
Naalakkersuisut pisassanik nutaanik naliliisarnermut namminneq tunngavigisatik malinngilaat.
Naalakkersuisut Tunumi saarullittassiissutit ukiut qulit sinneqartuni sinnerujussuarlugit akuersissuteqartarput.
Aviisi Sermitsiaq taama allappoq.
Naalakkersuisut Tunumi saarullinniarnermi uumassusilerisut innersuussutaat sinnerujussuarlugit pisassiisarnertik ingerlatiinnarpaat.
Nunatta ilaasortaaffigisaannut Nunat tamat akornanni Imartanik Ilisimatusarnermi siunnersuisoqatigiinnut (ICES-imut), ilisimatuut siunnersuisartut 2023-mut innersuussutigaat, Tunup avataani avataasiorluni saarullinniarnermi 8.460 tonsit amerlanerpaatut pisassiissutigineqassasut. Taakku siornamut sanilliullugit 300 tonsinik ikinnerupput.
Ikkannersuarmi Dohrn Bankemi aalisarneq
Naalakkersuisut kalaallit aalisartitseqatigiiffiinut Tunumi saarullinniarnermut pisassiissutaat tamarmiusut 27.145 tonsiupput. Politikerit taakku saniatigut Savalimmiut, Norge aamma EU 5.800 tonsinik pisassippaat. Tassa taamaalilluni pisassiissutit tamarmiusut katillutik 32.945 tonsiupput imaluunniit 33.000 tonsingajaapput.
Allatut oqaatigalugu politikerinit pisassiissutigineqartut, uumassusilerisut ilisimatuussutsikkut innersuussutaanit arfineq-pingasoriaammik amerlanerupput.
Aviisimi Sermitsiami atuarnerusinnaavutit. Aviisi uani pissarsiariuk:
