namminersulivinnissaq

Politikerit misilittagartuut isornartorsiorai

Politikkimi nuimasut Partii Naleqqami, IA-mi aamma Siumumi namminersulivinnissamut aningaasartassiissutilimmik pilersaarummik saqqummiisariaqarput 'iluareqqusaaginnarlutik sunniiniaannaratik', Demokraatit inuusuttaat taama isumaqarput

Demokraatit inuusuttaasa siulittaasuat, Rasmus Dalsgaard Andersen

- Kalaallit ajunngitsumik kissaakkussigit, siunnersuuteqartariaqarpusi maanna atukkanik pitsannguutaasussanik, Rasmus Dalsgaard Andersen (D) oqarpoq.

- Akerlianik imaqanngitsumik oqaluinnarpusi, tamannalu qinersinermi taasisussanut iluareqqusaarnikkut tusaaqqusaaraluarnertut kisiat takusinnaavara.

Demokraatit inuusuttaasa Sermitsiaq.AG-mit apersorneqarnermini Partii Naleqqap Hans Enoksenertaat pisuutitsiniaannarnerarlugu aqqutissarsiuinnginnerarpaa.

Namminersulivinneq kisimi kiffaanngissusinitsitsissaaq
Naleqqap siulittaasua, Hans Enoksen, ippassaq pingasunngornermi namminersulivinnissamut utaqqiinnartoqarunnaartariaqartoq tusagassiuutinut nalunaarummini allappoq-

- Nalornineq takkukkaangat immitsinnut aperigajuttarpugut 'aningaasaqarnerput qulakkeeqqaassanngilarput?' Danmarkimit tapiissutit matussuseqqaassanngilagut? Pissakinnerit ikioqqaassanngilagut? Nunat tamarmik unammilligassaqarput, kisianni nuna namminersortoq kiffaanngissuseqarluni nunap unammilligassai suliarisinnaavai, Partii Naleqqap siulittaasua allappoq.

Atuaruk: Partii Naleraq: Namminersulivinnissamut qaninnerulissaagut

Demokraatit inuusuttaasa siulittaasua isumaqarpoq, maanna namminersulivinnissamut piffissaanngitsoq. Aamma isumaqarpoq, ullumikkut Nunatsinni aningaasaqarnitta inissisimanera nukilaatsoq iluarsinissaanut periarfissanik ulikkaartugut.

- Kalaallit innuttaasa nunap unammillernartuinik isumaginninnissaannut akornusersuisoqanngilaq. Namminersorpugut taamaammallu nammineq inatsisiliornissamut pisinnaaffeqarpugut. Allatut oqaatiginninneq salloqittaaneruvoq, Rasmus Dalsgaard Sermitsiaq.AG-imut ullumi oqarpoq.

Ingerlatsinermut aningaasartuutit ernumassutigigai
Politikkikkut aamma kulturikkut maannakkorpiaq namminersulivinnissamik piumasaqarneq tunngavissaqartoqarsinnaannginnami?

- Ilumut, kisiannimi qanoq tassungassagatta? Eqqarsaatersuutinik piviusunik inuiaqatigiit maannakkorpiaq ingerlanneqarnerannut aningaasartuutit suminngaanniissanersut paaserusunnarpoq.

SIK-mi siulittaasoq, Jess G. Berthelsen taamaalluni oqarnikuuvoq, Danmarkip naalagaaffiata ataanniinnerminngaanniit siparnimut anarusunnerulluni. Atugarissaarnerup appaallanneqarnissaa akissutaasinnaanngila?

- Taamatut siparnimut anarusunnerulluni oqariartuuteqarnera akisussaassuseqanngitsuusoq isumaqarpunga. Naluara taamatut eqqarsarnini inuusuttunut ilinniartunut utoqqaat taamak pineqarnissaannut oqariartuut ingerlateqqikkusunneraa. Napparsimmaviimmigooq, napparsimasut angerlarlutik toquinnartassappat?

Atuaruk: Lars-Emil: Naalagaaffeqatigiinneq nukittorsagassaanngilaq - milliartortitassaruna

- Piviusoq tassaavoq, naalagaaffimmit tapiissuteqanngippat ingerlatsinermut aningaasaqanngilaq, nunaqarfiit piujuaannarnissaat Partii Naleqqamit pingaartinneqartoq eqqaanngikkaluarlugu. Namminiersulivinnissamut aningaasat suminngaanniitssagamik?

Maanna kiffaanngissuseq iluarisimaaraa
Namminersulivinnissaq akilersinnaassagaluarpat ajunngitsunik iluaqutaasunik amerlasuunik sunniuteqarsinnaannginnami?

- Aningaasaqarnikkut sukkut pitsaaquteqassagami? Maannakkut naalagaaffeqatigiinnermut peqataaneq iluaqutissaannaavoq. Napparsimasut maani Nunatsinni suliarineqarsinnaanngikkaangata Danmarkimi suliarineqartarput, aamma ilinniaqqiffissat Danmarkimi akeqanngillat.

Atuaruk: Kim Kielsenip eqqissisimasumik sulinini takutippaa

- Namminersulivileriasaarutta takusinnaanngilara aningaasat milliardilippassuit suminngaanniit puttuteriasaarsinnaanersut. Takusinnaanngilluinnarpara. Siunnersuutissat takuinnariartigit, siunnersuutissaqartoqarnerpami?

Partii Naleqqap siunnersuut saqqummiussaa, naalagaaffimmit tapiissutit qaffallugit isumaqatigiissutigisinnarlugit ukiuni arlalinni annertunngitsukkaarlugit tunniuttarnissaat, kingusinnerusukkullu unitsinneqarnissaat namminiilivinnissamut aqqutaasinnaanngila?

- Siunnersuut piviusorsiunngippallaaqaaq. Danmark sooq aamma milliardinik amerlanerusunik maanna isumaqatigiissutaasumit tunniussimassagami? Immaqa Lars Løkkep isumaqataasinnaavoq, kisiat ilimaginngilara. Qanormi aamma iliussagatta taanna pilersaarut atorlugu ukiut qulit qaangiuppata immitsinnut aningaasalersorsinnaassagaluarutta?

Enoksen sooq sapertoq?
Rasmus Dalsgaard Rasmussen isumaqarpoq, namminersulivinnissamik oqariartuuteqartut akisussaaffitsik ilisimanngikkaat.

- Taakku politikerit qinigaapput. Namminersulivinnissamik suaartalinnguarunik akissuteqartariaqarput, partiimi inuusuttuni siulittaasoq oqarpoq.

- Tassunga atatillugu paaserusunnarpoq, sooq Hans Enoksen nammineerluni ukiorpassuarni Naalakkersuisuni siulittaasuunermini Kalaallit Nunaat namminersulivinnissaa iliuuseqarfigisimannginneraa, politikeri inuusuttoq naggasiivoq.

Atuaruk: Partii Naleraq: Namminersulivinnissamut qaninnerulissaagut

Powered by Labrador CMS