Politikerit misiginneqataasut

Naalakkersuisut aamma Avannaata Kommuniani kommunalbestyrelse Upernavimmi coronamik tunillatsissimasoq toqummat ilaqutaasunut misiginneqataallutik nalunaaruteqarput.

Angut utoqqaq coronamik tunillatsissimasoq toqusimasoq, Naalakkersuisut arfininngornermi ualikkut kalerrinneqarput.

- Arfininngornermi ualikkut paasitinneqarpugut covid 19-qarluni toqusoq siulleq nalaanneqarsimasoq, pisorlu alianaqisoq assut attorteqqassutigaara. Qimagaasut eqqarsaatinniitsippakka misiginneqatigalugillu, Naalakkersuisut siulittaasuat Múte Bourup Egede tusagassiorfinnut nalunaaruteqarluni oqarpoq.

- Ilaqutaasut qimagaasullu misiginneqatigingaarpakka, peqqissutsimut Naalakkersuisoq, Kirsten L. Fencker oqarpoq.

Avannaata Kommuniani kommunalbestyrelse aamma misiginneqataalluni nalunaaruteqarpoq.

En lille gruppe borgere i Upernavik, der sang en salme for at vise deres medfølelse.

- Upernavimmi Covid 19-imik tunillatsissimanerup kinguneranik toqusoqarnerani ilaqutaasut toqukkut qimagaasut kommunalbestyrelse sinnerlugu misiginneqatigaakka, borgmester Palle Jeremiassen tusagassiorfinnut nalunaaruteqarluni allappoq.

Upernavimmi innuttaasut 20-t missaat Upernaviup peqqissaaviata silataanut arfininngornermi ualikkut aamma katersuupput, misiginneqataanertillu takutinniarlugu tussiarlutik. Katersuunnermi imminut ungasinnissaq malinneqarpoq, peqataasullu qanermut assiaquteqarlutik.

Maleruaqqusat malissigit

Upernavimmi tunillaassuunnerup qanoq ingerlanera pillugu piffissami kingullermi paasiniaalluni misissuisoqarpoq. Pingasunngormat tunillatsissimasumik paasisaqaqqaartoqareersorlu, innuttaasut 400-t pallillugit maannamut misissortissimalerput. Misissuinerit sapaatip akunnerata tulliani ingerlanneqaqqissapput, misissugassallu siulliit Nuummi misissorneqarnissaminnut maanna utaqqipput.

- Inuiaqatigiinni tuniluunneq sukkasoorujussuarmik ingerlavoq, taamaattumillu ataatsimoorluta covid-19 akiorniartariaqarparput. Nappaatip tuniluunnera minnerpaaffianiitsinniarlugu malittarisassat innersuussutigineqartut malittariaqarpagut. Aamma suli akiuussuserneqarsimanngitsut kaammattorusuppakka akiuussuserteqqullugit; imminuinnaq pinnata kisiannili inuiaqatigiinni sanngiinnerusortagut aamma pillugit, Kirsten L. Fencker oqarpoq.

Avannaata Kommuniani borgmesterip innuttaasut oqartussat maleruaqqusaannik malinninnissamik kaammattorpai:

- Corona ukiuni marlunngulersuni atugarisimavarput, coronamullu akiuiniarluarsimavugut. Nakorsaanerup innersuussutaanik malinnilluarsimavugut, taamaakkaluartorli innuttaasut tamaasa innersuussutinik makkuninnga malinninnissaat kaammattuutigissavara, Palle Jeremiassen oqarpoq.

Innersuussutit ukuupput:

  • Napparsimaguit angerlarsimagit
  • Assatit asakulakkit imaluunniit spriti assannoortoq atoruk
  • Talivit peqittarfianut quersorlutilluunniit tangajorit
  • Timikkut attuinaveersaarit – assamminnaveersaarit, ersakkut kunissinaveersaarit, pakkutaarinaveersaarit il.il.
  • Eqqiaakulagit inillu silaannarissakulakkit – angerlarsimaffinni suliffinnilu
  • Inunnut allanut qanillinaveersaarit allallu taamaaliornissaannik piumaffigikkit.

Peqqinnissaqarfiup misissuinerit akiuussusersuinissamullu periarfissat annertusassagai, peqqissutsimut Naalakkersuisup Kirsten L. Fenckerip ilisimatitsissutigaa.

Powered by Labrador CMS