like or dislike?

Politikerit Facebook tativaat

Socialdemokratit kulturimut oqaaseqartartuata Mogens Jensenip Facebook ernumanartoqartippaa aasaaneranilu sulinngiffeqarnerup kingorna tusarniaaviginiarlugu

Facebook misissorneqassaaq, qallunaani inuiaqatigiinni taama pingaaruteqartigimmat.
Taamatut Berlingske-mut oqarpoq Socialdemokratit kulturimut oqaaseqartartuat Mogens Jensen, taassumalu Facebook tusarniaaviginiarpaa Folketingi aasaanerani sulinngiffeqareerpat.
– Facebook Danmarkimi oqalliffiullunilu paasissutissiiffiuvoq, qularutissaanngilarlu tunngavissaqarluarporlu Facebookimi politikkit ilaannut annertuumik qularnartoqartitsinissamut.
– Ilaatigut inuit naapittarfianni ileqqorissutsikkut iliuutsit, ilaanneeriarluni killilersuerpasittartut, Mogens Jensen Berlingskemut oqarpoq.
Tusarniaanermi oqaluuseriniarpaa amerikarmiut ingerlatsiviat politikkikkut oqaloqatigineqarsinnaanersoq.
– Tamanna iluatsissanngippat alloriarneq tulleq tassaasinnaavoq kattuffiit, innuttaasut, tusagassiorfiit poltiikerillu Facebookimik atuiunnaarnissaannik sunnerniarnissaat, pissutigalugu inuit naapittarfiata naleqartitai qallunaat soorlu killiligaanani oqaaseqarsinnaatitaanermut naleqartitatoqaannut naapertuutinngimmata, Mogens Jensen oqarpoq.
Venstrep politikkikkut oqaaseqartartuata Ellen Trane Nørbyp tusarniaanissaq taperseraluarlugu Facebook EU-mit taterusunneruvaa.
– Facebook inuiaqatigiinni oqallinnerup ilagaa pingaarutilerujussuaq tamannalu politikeritut isummerfigisariaqarparput, tassami kinguneqaateqartarpoq ingerlatsivik namminersortoq isernissamut nakkutilliisuulerpat, Elle Trane Nørby aviisimut oqarpoq, taannalu aamma Venstrep tusagassiorfinnut oqaaseqartartoraa.
Atuaruk: "Facebook-ikkut Siumumi akerleriinneq: Vittup Per B. anisinniarpaa".
– Allaanerulluinnartumilli sunniuteqassaaq EU-p tamarmiusup Facebook sunnerniarpagu.
EU aqqutissaavoq qallunaat politikeriisa Facebook iluarsiiviginiarpassuk, Peter Nedergaard isumaqarpoq, taannalu Københavns Universitetimi naalagaaffiit pissusiinik ilisimatusarnermi ilisimatuujuvoq.
– EU arlalinnik periarfissaqarpoq ingerlatsiviup Facebook-ip iluarsiiviginissaanut - ilaatigut pissutigalugu Facebook kisermaassipajaartutut inissisimammat, Peter Nedergaard Berlingske-mut oqarpoq.

Powered by Labrador CMS