Politikerit ATV-nut aqqutip piareerneqarnissaanut ilassutitut 5 millioninik aningaasaliissuteqarput

Qeqqata Kommuniani ATV-nut aqqutip naammassineqarnissaa 20,7 millionit koruuninik akeqarpoq. Taamaammat kommunalbestyrelsi sisamanngornermi ilassutitut 5,3 millionit koruuninik aningaasaliisoqarnissaa akueraa, Kangerluarsuk Tulliup aamma Kangerlussuup akornanni aqqutip 16 kilometerisut isorartussusillip iluarsartuunneqarnissaanut aningaasat taamaalillutik naammalerput.

Akuersissuteqartoqarnerani aqqusinniornermik suliniuterujussuup aappaagu naammassineqarnissaa naatsorsuutigineqalerpoq, tamannalu Gideon Lyberthip, Qeqqata Kommuniani borgmesterip tulliata siulliup nuannaarutigaa:

- Nuannaarutigaara inuttaasuniit utaqqikatanneqarsimasoq aappaagu 2024-imi naammassisusanngorlugu aasaq manna nangeqqissinnaanngoratsigu, taanna oqarpoq, iluarsartuussinerlu aasamut aallartissasoq ilisimatitsissutigaa.

- Taamaasilluta innuttaasut ajornannginnerusumik asimukarsinnaalernissaannik aammalu takornarissanut pissanganartumik allaanerusumillu neqerooruteqarsinnaanermik pilersitsissaagut, tamatumunngalu isumalluaqaanga, Lyberth oqarpoq.

Imermut kuuffissiorneq aamma sinneruttunit kuuttut

Naammassineqarnissaa ilimagisamit akisuneruvoq. Tamanna inuussutissarsiornerup ineriartortinnissaanik isumannaatsumillu imermik pilersuinissaq siunertaqartumik, allaffeqarfik naapertorlugu imeqarfiup eqqaani ATV-nut aqqusinniornissaq aamma sinnikunut kuuffissamik naleqqutissaaq.

Oqaluuserisassat naapertorlugit, aqqusineq sioraasoq imermut kuuffissap tungaanut assigiimmik sivinganilerlugu aqquserngup toqqavianik meterinik arlalinnik portussusilerlugu takissusilerlugulu sanaajuvoq.

Kangerluarsunnguup tungaanut kuussuup tungaanut naammattumik sivinganilimmik imermut kuuffissiornissamut aqquserngup toqqavia portusooq pisariaqarpoq, taamaalilluni aattortumit imeq aamma biilinit sinnerusuttuusinnaasoq imeqarfik taassumalu nunataa avaqqullugu kuutsinneqarsinnaassalluni.

Illersuinissamut piumasaqaat

ASN-imik akuersissummi piumasaqaataasoq malillugu imeqarfiup qanittuani qaartiterisoqaqqusaanngilaq, taamaattumik ujaqqanik qaartiternerlukunik assartukkanik aqqusinermut toqqavik suliarineqartariaqassaaq, aammalu aqquserngup imermullu kuussinerup ataani uuliamik pitarneqarsinnaanngitsumik ameraasalimik pilersitsisoqassalluni, borgmesteri Malik Berthelsen nassuiaavoq.

- Imeqarfik illesorniarlugu piumasaqaatit assigiinngitsut soorunami akisunerulersitsipput, kisianni tamatta soorunami soqutigisarivarput minguitsumik imeqarnissarput, taamaattumik akisunerulersitsisut avaqqussinnaanngilagut,

BJ Enreprise sanaartornermik naammassinninnermillu suliarinnittuussaaq.