Politikerit aningaasanik akileraarutineersunit atuineranik takunnissinnaanermik Suleqatigiissitsisut piumasaqarput
Savalimmiunitut ammasuunissamik inatsimmik Tillie Martinussen siunnersuuteqarpoq
Naalakkersuisup Doris J. Jensenip (S) benziinamut akiliut atorsinnaasaata atornerlunneqarsimaneranut suliaq oqallisaasorujussuuvoq.
Siunissami suliat taamaattut pinngitsoortinniarlugit, naalakkersuinermik suliaqartut pisortat aningaasaataannik atuinerannik tamakkiisumik ammasoqarnissaanik, Tillie Martinussen siunnersuuteqarpoq.
- Pissutigalugu: Naalakkersuisut Inatsisartullu atorfimminnut atatillugu akileraarutinik atuinerannut atatillugu ilanngussat takuneqarsinnaasariaqarput. Ilassissinnermut atatillugu aamma angalanermut atatillugu ilanngussat tamarmik qarasaasiami tamanit takuneqarsinnaasariaqarput, taanna tusagassiuutinut nalunaarummi allappoq.
Tillie Martinussen (Sul) Savalimmiunit isumassarsiorsimavoq, tassani taamaattumik inatsiseqarpoq.
Suliami maanna ingerlasumi ersarippoq, akiliut umiatsiamik orsiinermut katillugu 6.855,45 koruuninut atorneqarsimavoq. Aningaasat taakku utertinneqareerput. Kisianni kukkunersiuisup pisortanit akuerisap Deloittemeersup, Bo Colbep misissuinermi oqaatigaa, atuineq malunnartumik annertoorujussuusoq. Kisianni umiatsiamik orsiinerup saniatigut atuinerup tamakkiisumik annertussusaa ammasumik ilisimaneqanngilaq.
- Perulluliortitsineq, perulluliortitsinerpassuarnut ilaasoq, ilanngussanut tunngasoq aamma aningaasanik paarilluaqqusanik atornerluisimanermut tunngasoq imminut iluaquserniarluni, angalanerit akilerneqartarsimanerat inatsisinik tunngaveqarani aamma pisinnaatitaassutsit paarilluaqqusat, Tillie Martinussen allappoq.
Deloittep siorna novembarimi akiliutip atorneqarnera pillugu paasissutissiissutini ilinniartitaanermut, kultureqarnermut, ilageeqarnermut ilisimatusarnermullu naalakkersuisoqarfimmut tunniuppaa. Taamanili Doris J. Jensenip (S) kukkunersiuinermut ataatsimiititaliaq aamma Naalakkersuisut suliaq pillugu paasitippai. Tillie Martinussen §37 naapertorlugu apeqquteqarmat aatsaat suliaq tamanut saqqummiunneqarpoq.
Suleqatigiissitsisut siunnersuutiminnut tapersersorneqassagunik, suliat taamaattut matoqqasumik ingerlanneqartarunnaassapput.
- Illersussavaatigut atornerlunissamut, atuivallaartoornissamut pinaveersimatitsissaaq aamma politikerinut systemimullu tatiginninnerulernissaq pilersinneqassaaq. Aamma inuit tamarmik takusinnaassavaat aningaasat sumut atorneqarsimanersut, Tillie Martinussen isumaqarpoq.
Ammasuunissamut inatsimmik taamaattumik upernaakkut ataatsimiittoqalerpat partii siunnersuuteqarniarpoq.