Københavnimi toqusoq
Politikerip immikkoortitsisoqarsimanissaa ernummatigigaa
Købehavnimi regionsrådimi ilaasortap peqqinnissaqarfimmi sulisut immikkoortitsisimasinnaanerat ernummatigaa kalaaleq angerlarsimaffeqanngitsoq ataasinngornermi toqoreersorlu
Sermitsiaq.AG-mi allaatigineqareersutut angut kalaaleq 32-nik ukiulik Amagerbro Stationip eqqaani ataasinngormat toquvoq. Angut toquvoq ambulancit pingasoriarluni aggersarneqareeraluartut. Ambulance aggersarneqaqqaarnerminit 26 minutsit qaangiuttut aatsaat tikiuppoq, tassa Danmarkimi nal. 15.49-nngortoq.
Maanna regiondsrådimi ilaasortap SF-imeersup, Jens Mandrupip, Amagerbro Stationip eqqaani pisoq qisuariarfigaa. Taassumami ernummatigaa peqqinnissaqarfimmi sulisut angut kalaaleq angerlarsimaffeqanngitsoq immikkoortissimagaat.
Angerlarsimaffeqanngikkaluaraanni imaluunniit naamik, taava assigiimmik sullinneqartussaavugut. Kisianni angerlarsimaffeqanngitsut peqqissutsimikkut mianersuutassaanerummata, taava sukkanerusumik qisuartoqarsimasimasussaangaluarpoq, Jens Mandrup Sermitsiaq.AG-mut oqarpoq, nangillunilu:
Angut Købenahavnip qeqqani ikiornissani nalavoq, taamaammat ambulancimik aggertitsisoqannginneranut tamanna utoqqatsissutaasinnaanngilaq. Immikkoortitsisoqarsimappat akuerineqarsinnaanngilaq.
Pisortat pisoq misissuiffigaat
Region Hovedstadens Akutberedskabip maanna pisoq misissuiffigaa. Sulisut ambulancemik aggersaanermut tigusisut pisut misissuiffigineqarnerani suliunnaarsinneqarallarnerannik kiguneqarluni.
- Peqqinnissaqarfimmi sulisut eqqarsarlutik ’kalaaliinnaasoq’ pilertornerusumik qisuariarsimanngippata, taava soraarsinneqartariaqarput. Immikkoortitsineruvormi, Jens Mandrup SF-imeersoq oqarpoq.
Københavnip politiivini vicepolitiinspektøri, Tommy Keil, Sermitsiaq.AG oqaluttuarpoq angut kalaaleq 32-nik ukiulik pineqartoq, aammalu angut angerlarsimaffeqanngitsuussangatinneqartoq.
Tommy Keilip ilanngullugu ilisimatitsissutigaa politiit naatsorsuutigigaat toqusup kinaassusaa pingasunngornermi sisamanngornermiluunniit paasineqarsimassasoq.