Maniitsoq
Politikeri: Alcoamik aatsitsivittaarniarpugut?
Maniitsup eqqaani aluminiumik aatsitsiviliorfiliortoqarnissaa naalakkersuisut suli upperineraat, Inatsisartunut ilaasortap Siverth K. Heilmannip paaserusuppaa
Aluminiup akia maanna appasingaarmat amerikami tamakkuni nioqqutissiortoq Alcoa, Maniitsumi aatsitsiviliornissaanut iluanaarutissaqarpianngilaq. Taamaattumillu suliniut piffissaligaanngitsumik unitsikkallarneqaqqavoq.
Inatsisartunilu ilaasortaq, Atassummeersoq Siverth K. Heilmann, paragraf 37 naapertorlugu apeqqummini, Maniitsup eqqaani aluminiumik aatsitsivimmik Tasersiap tungaani erngup nukinganik innaalgissiorfeqartumik pilersitsisoqassanersoq Naalakkersuisut suli upperineraat akissutissarsiffigerusuppaa.
Atuaruk: Alcoap kinguartitseqqinnera Maniitsumi uggorineqarpoq
Innuttaasut nuannattut
- Suliap ingerlaarnerani pilersaarusiorneq malillugu eqqaamaniarpara, kingusinnerpaamik ukioq manna Alcoa isummereertussaavoq aatsitsiviliortoqassanersoq, Siverth K. Heilmann tunngavilersuutimini allappoq.
Alcoamik atsioqateqartoqarmat Maniitsormiorpassuit nunatsinnilumi innuttaasorpassuit nuannattut, taassuma erseqqissarpaa.
Periarfissaq alla?
- Maniitsormiut pilersaarummut tikilluaqqusingaarput, sulilu tamanna attanneqarluni, taamaattumik tamanna Naalakkersuisunit paaserusunnarsilluinnarpoq, taanna oqarpoq nangillunilu:
- Alcoap pilersaarumminik taamaatitsissagaluarpat, suliffeqarfissuaq Norsk Hydro aatsitsiviliornissamik sanaartornissamillu misilittagaqarluartoq unammillernikuusorlu, suli soqutiginninnersoq aperineqarsinnaasunullu akuulluarsinnaanera qularinngilara.