Politiit: Ukiukittut atisaqanngittut assiginik siammarterineq inerteqqutaavoq
Niviarsiaqqap ukiukittup atisaqarani assiga Qaqortumi maannakkorpiaq siammarterneqarpoq. Politiit tassunga atatillugu innuttaasunut eqqaasitsissutigerusuppaat, meeqqat pillugit pornolianik siammarterineq inerteqqutaalluinnarmat kinguneqartitsisinnaallunilu.
Qaqortumi politiit pingasunngornermi nalunaarfigineqarput, niviarsiaqqap 15-it inorlugit ukiullip atisaqarani assiga illoqarfimmi inuusuttut akornanni siammarterneqartoq. Asseq pingaartumik inuit attaveqaqatigiittarfiatigut Snapchat-ikkut siammarterneqartoq, politiit tusagassiorfinnut nalunaaruteqarlutik allapput.
- Suliami pasineqartoq tigusarineqarsimavoq, taanna assimik siammarterisimasutut unnerluutigineqarpoq. Pineqartup mobiltelefonia arsaarinnissutigineqarsimavoq. Pasineqartoq aamma 15-it inorlugit ukioqartoq, politiinit ilisimatitsissutigineqarpoq.
Kalaallit Nunaanni Politiit inuusuttunut allanut sakkortunerpaamik eqqaasitsissutigerusuppaat, meeqqat 15-it inorlugit ukiullit atisaqaratik assiginik siammarterineq inerteqqutaammat, meeqqat pillugit pornolianik siammarterinerummat, tamatumalu malitsigisaanik mobiltelefonit, qarasaasiat allallu elektronikkiusut arsaarinnissutigineqarsinnaapput kiisalu sakkortuumik pineqaatissiissutaasinnaallutik, politiinit oqaatigineqarpoq.
- Meeqqap 18-it inorlugit ukiullip atisaqarani assiganik tigusaqassaguit, ingerlaannartumik politiinut saaffiginnillutit nalunaarutigissavat. Pingaaruteqarluinnarpoq assimik ingerlatsitseqqinnginnissat, meeqqammi pillugit pornolianik siammarterisutut unnerluutigineqarsinnaagavit.
Kalaallit Nunaanni Politiit meeqqat pillugit pornolianik siammarterisoqarnerani annertuumik suliaqartarput suliarlu ilungersunartutut isigisarlugu.