Politiit: Suliffeqarfiit nunami allamiunik sulisoqarnermi inatsit malippaat
Politiit, Akileraartarnermut Aqutsisoqarfik, Suliffeqarnermut Naalakkersuisoqarfik, Ilisimatusarnermut avatangiisinullu Naalakkersuisoqarfik aamma Kommuneqarfik Sermersooq Nuummi suliffeqarfinnut misissuiartorlutik angalaqqammerput.
Oqartussat assigiinngitsut martsip 31-ani 2022-mi suliffeqarfinnut Nuummiittunut nunami allamiunik sulisoqartunut misissuiartorput. Misissuinermi qulakkeerniarneqarpoq unioqqutitsilluni sulisoqanngitsoq aamma ajornerusumik atugassaqartitisoqanngitsoq. Suliffeqarfiillu inatsimmik unioqqutitsisimanngillat.
- Suliffeqarfinnut ornigulluni misissuinerni anguniarneqarpoq Kalaallit Nunaanni nunami allamiunik sulisoqarnermi nunami inatsit malinneqarnersut misissornissaat. Tassa unioqqutitsilluni tikisitsisimannginneq, sulisitsinnginneq ajornerusumik atugassaqartitsisoqanngitsorluunniit tassani misissuinermi sammineqarput, politikommisæri, Malik Sandgreen aamma Kalaallit Nunaanni politiit misissuisarfiani pisortaasoq oqarpoq.
Akileraartarneq sulinissamik akuersissuteqarnerlu
Nunami allaameersut kinaassusaat, sulinermik akuersissuteqarnersut, sulinermilu isumaqatigiissutit akileraartarnermillu tunngassuteqartut oqartussaniit misissuiffigineqarput. Misissuinermilu suliffeqarfiit sulisullu unioqqutitsisimanngillat.
- Inatsisit malinneqarnersut aamma ajornerusumik atugassaqartitsinermi inatsisit malinneqarnersut qulakkeerniarlugu misissuisoqarpoq, politikommissæri tusagassiuutinut nalunaarummi allappoq.
Inatsisinik unioqqutitsinermi sulisitsisut akiligassinneqarsinnaapput, taassumallu sanitigut nunami allameersut nunamiit aallartinneqarsinnaallutik. Politiit paasissutissiipput.