Politiit: Neriniartarfimmiinermi akiligassinneqartoq
Arnaq 60-inik ukiulik naammassilluni akiuussusersorneqarnani coronamillu tunillatsissimannginermi takussutissamik sivisunerpaamik 48 tiimini pisoqaassusilimmik politiinut uppernarsarsinnaanngimmagu 3.000 koruuninik akiligassinneqarpoq. Politiit illoqarfimmi taamungaanaq pingasunngornermi ualikkut misissuipput.
Kalaallit Nunaanni politiit covid-19-ip tuniluunnera siammatsaaliorniarlugu illoqarfinni soorlu neriniartarfinni imerniartarfinniluunniit maleruaqqusat malinneqarnersut paasiniarlugu taamungaannaq innuttaasut akornanni misissuisaqattaarput. Maanna arnaq 60-inik ukiullip maleruaqqusanik unioqqutitsisimanermini 3.000 koruuninik akiligassinneqarpoq.
- Nuummi politiit neriniartarfinni augustip 4-ani nalunaaqutaq 15.30 missaani misissuiartorput. Misissuinerminnilu arnaq 60-inik ukiulik suli naammassilluni akiuussusersorneqarsimanngitsoq coronamik tunillatsissimannginnermut uppernarsaat sivisunerpaamik akunnernik 48-nik pisoqaassuseqartumik neriniartarfimmiinermini takutitsisinnaasimanngilaq, politiit tusagassiuutinut nalunaarumminni allapput.
Arnaq taanna maanna nalunaarummut atuutsinneqartumut unioqqutitsisimasutut unnerluutigineqarpoq. Naammassillutik akiuussusersorneqarnikut coronamillu tunillatsissimannginnermik akunnerni 48-nik pisoqaatigisumik kikkut tamarmik ornissinnaasaanni nalunaarut juulip 31-aniit augustip 10-ata tungaanut atuutsinneqarpoq.
- Taanna arnaq ullumi augustip tallimaani akigassaq akueralugu atsiorpaa, politiit paasissutissiipput.
Naammassillutik akiuussusersorneqarnikut coronamillu tunillatsissimannginnermik uppernarsaat akunnerni 48-ni pisoqaasusilimmi uppernarsaasinnaasut taamaallaat neriniartarfinniisinnaapput, imerniartarfinni allanilu aaqqissuusani. Nalunaarut taanna augustip 10-ata tungaanut atuutsinneqarpoq.