Politiit: Nangikkiartarnerit mianeralugit

Politiit sapaatip-akunnerata naanerani suliarisimasaannut ilaasimasut nangikkiartarnermut atatillugu nalinginnaasumik ajornartorsiutaasartut assersuutissaapput.

Inuit imerniartarfiit matugaangata angerlarsimaffinnut nalinginnaasumik nangikkiartarput. Tamannalu ajortumik kinguneqarsinnaasartoq, pigaartut pisortaat Søren Bendtsen oqaluttuarpoq.

Politiit misilittagaat malillugit, nangikkiarsimanerit kinguaassiuutitigut innarliisoqarsinnaaneranik annertunerulersitsisarput:

Innarlerneqarnermi aatsaat itertoqartartoq

- Nangikkiarsimaneq unnuaq naallugu ingerlasinnaasarmat, inuit ilaat unnuisarput imaluunniit siniliinnartarlutik, taamalu atornerlunneqarsinnaasarlutik. Assersuutigalugu takusarpavut angutit arnallu atornerlunneqarsimasutut misigisimasarut, atoqatigineqalereerlutik aatsaat itertaramik.

Pigaartut pisortaata ilanngullugu oqaluttuaraa, inuit aalakoorpallaaleraangamik akiuussinnaasanngitsut. Tamatumalu kinguneranik kanngutsaattuliortoqartarlunilu pinngitsaaliilluni atoqatiginnittoqartartoq.

- Inummik aalakoortupilussuarmik atoqateqarneq pinngitsaaliilluni atoqatiginninnermut assersuunneqarsinnaavoq, Søren Bendtsen oqarpoq, imatullu siunnersuuteqarluni:

- Illoqarfimmi nuannisarsimaguit, taxarlutit angerlarit, pigaartut pisortaat oqarpoq.

Imminornissamik aarlerisaarinermik aamma kinguneqarsinnaasoq

Pigaartut pisortaata ilanngullugu ajornartorsiutaanerarpaa, inuit nangikkiaqqinnerminni kamaatilersinnaasarnerat.

- Inuit unnuaq naallugu immaqalu aqanguani ingerlaqqillutik ernuttaramik oqqatilersinnaasarput, taamalu qanoq iliuuseqarnertik eqqarsaatigilluarsinnaasarnagu, pisaartut pisortaat oqarpoq.

Pisut ajorsiartuinnarlutik imminut toqunnissamik aarlerisaarisarnerit atuutilersarput, pigaartut pisortaat oqarpoq.

Tusaannga

Imminut toqunnissamik eqqarsaateqaraanni imaluunniit kiserliortutut misigisimagaanni Tusaannga 801180 aqqutigalugu sianerfigineqarsinnaavoq imaluunniit 1899 aqqutigalugu sms-ertoqarsinnaalluni kinaassutsimik isertuussilluni akeqanngitsumillu siunnersuisartunik oqaloqateqarniarluni.

Tusaanngap ammasarfii tassaapput:
Ataasinngorneq-sisamanngorneq nal. 9.00-22.00
Tallimanngorneq nal. 9.00-04.00
Arfininngorneq nal. 16.00-04.00
Sapaat nal. 16.00-22.00

- Aalakoorpallaarneq pissutigalugu imminut oqaloqatigiissinnaaneq annikillisingaatsiarneqartarpoq, imminullu toqunnissamik aarlerisaarisoqalersarluni, taanna oqarpoq, nangillunilu:

- Ikiorneqarusuttut ajornartorsiutaavallaartanngillat. Kommuni peqqinnissaqarfillu suleqatigalugit ikiorserneqarnissaat isumagisarparput. Inoqartarporli sumiinnerminnik ilisimatitserusuttanngitsunik.

- Taakku ikiorniarnerat ajornarsinnaasarpoq, pinngitsaalillugillu ikiorserneqarnissaanik aarlerisaarisarneq pitsaasuunani, pigaartut pisortaat oqarpoq.