Politiit: Matusineq malunnarpoq
Politiit illoqarfimmi pingaarnerpaami unnuaq eqqissisimasumik sullipput. Imerniartarfiit matoqqatinneqarnerat malugineqarsinnaavoq, aqqusinermi annersaanerit angerlarsimaffinnilu eqqissiviilliornerit ikinnerupput.
- Aqqusinermi annersaanerit angerlarsimaffinnilu eqqissiviilliornerit ikinnerupput. Unnuaq eqqissisimasumik ingerlavoq allanik annertuunik pisoqanngilaq. Imerniartarfiit matuneqarnerat malunnarpoq, naatsorsuutigaarput sapaatip akunnerata naanera eqqissisimaarfiussasoq, kisianni soorunami tamanna nalunartuaannarpoq, pigaartut pisortaat Mads Lynge Sermitsiaq.AG-imut oqarpoq.
Imerniartarfiit, tusarnaatitsinerit, cafiit neriniartarfiillu tamaasa coronamik sisamanngornermi tunillatsittoqarsimasoq paasineqareersorlu ippassaq matuneqarput. Oqartussammi tunillatsittoq kingulleq qanoq tunillatsissimanersoq ilisimanngilaat, taannami Nuummi tunillatsissimasut marluk attavigisimanngilai.
Nuummi sapaatip akunnerata naanerani eqqissisimasumik ingerlanneqarnissaa politiit naatsorsuutigaat, sinerissamilu sumiiffinni ataasiakkaanni ulapaarfiusimavoq.
- Sumiiffinni assigiinngitsuni ulapaarfiulaarsimavoq, kisianni angerlarsimaffinni eqqissiviilliornerupput. Allanik annertuunik suliassanitsitsisoqanngilaq, Mads Lynge oqarpoq.