Politiit: Kinguaassiutitigut kannguttaatsuliornerit amerlasoorpassuit
Ukiuni tallimani kingullerni kinguaassiutitigut kannguttaatsuliorluni pinerlunnerit amerliartuaarujoorput, tamannalu "inuiaqatigiit ajornartorsiutaasa annersaasa ilaattut" politimesterip Bjørn Tegner Bayip oqaatigaa, ingammik meeqqanut kannguttaatsuliornernut tunngatillugu.
Politiit ukiumut 2018-imut nalunaarutaat saqqummiunneqaqqammerpoq, assigiinngitsutigut ilorraap tungaanut ineriartortoqarpoq, kisianni kinguaassiutitigut kannguttaatsuliornerit amerliartuinnarput.
Qulequttani pinngitsaaliinernut, kannguttaatsuliornernut aamma meeqqanut kannguttaatsuliornernut tunngasuni pinerluttulerinermut inatsimmik unioqqutitsinerit ukiup siulianut sanilliullugu amerleriarput.
Imminut akerleriit
- Nalunaarutiginninnerit amerleriarnerat pitsaasutut isigineqarsinnaanerat, isummat imminnut akerleriiffigaat. Kinguaassiutitigut kannguttaatsuliortarnerit pillugit paqumiginninneq atorunnaariartuaarusaarnera, politiini aamma unnerluussisussaatitaasuni maanna malugaarput. Nalunaarutiginninnerit amerlinerannut tamanna pissutaappat, amerleriarnerat pitsaasumik ineriartortoqarneranik isigineqarsinnaavoq, taamaalilluni eqqugaasut amerlanerusut ikiorserneqarnissamut periarfissaqalissagamik, pinerluuteqartullu amerlanerusut pinerluutiminnut akisussaatinneqassammata, politimesteri ukiumut nalunaarutip 36-nik qupperneqartup siulequtaani taama allappoq.
Aqqut takisooq
- Aqqulli suli takivoq. Nunatsinni sumiiffiit ilaanni meeqqanut kannguttaatsuliornernik nalunaaruteqartoqarneq ajormat eqqarsarnarpoq, sumiiffiillu ilaanni nalunaaruteqartartut amerlasoorujussuullutik. Sumiiffiit ilaanni kannguttaatsuliortoqartannginneranik tamanna pissuteqarpa – imaluunniit nassuiaatissaq allaasinnaava?, Bjørn Tegner Bay aperivoq.
Kisianni pinerluttulerinermut inatsisip unioqqutinneqartarneranut nalunaarutit aatsaat taama ikitsigimmata, politimesterip nuannaarutigaa. 2018-imi politiit 3.449-nit nalunaarfigineqarput, tamannalu 1986-imut sanilliutissagaanni affangajaannaraat, pinerluttulerinermut inatsimmik unioqutitsinermut nalunaarutit taamani 6.721-iummata.
Pitsanngoriartorneq
Suliani allani aamma pitsanngoriartortoqarpoq:
- Angerlarsimaffinnut tillinniartartnerit 2016-mit affaannanngorput
- Inuusuttut pinerluuteqartartut ikiliartuinnarput
Pitsaasumik ineriartortoqarneranut nassuiaatissatut politimesteri ima oqarpoq:
- Kalaallit Nunaanni pinerluttartut aamma inuusuttut pinerluttartut ikiliartornerat ilaatigut pisortat, kajumissutsiminnik sulisut aamma peqatigiiffiit namminersortut pitsaaliunermik suliaqarnerannik pissuteqarsinnaavoq.
Nakuusernermut kisitsisit
Nakuusernerluni pinerlunnermut tunngatillugu nalunaarutit ikiliartorput, kisianni nuannaarutissamik taasassaqarpallaanngilaq.
- Ikileriarnerat soorunami pitsaavoq, kisianni suli amerlavallaarput. Tassami inuit 1.000-iugaangata inuit 13-it nakuuserfigineqarput. Savalimmiuni aamma Danmarkimi kisitsisit 1,6-imi aamma 5-imi inisissisimapput, politimesteri ilisimatitsivoq.