Politiit: Kina seqqortaarsimanersoq ilisimanngilarput
Tasiilami sisorartarfiup ungasinngisaani marlunngornermi ualilersoq aallaasersortoq politiinit suli tiguneqarsimanngilaq. Kina seqqortaarsimanersoq ilisimanngilarput, suliamili suli paasiniaavugut, politiini pigaartut pisortaat ilisimatitsivoq. Politiit erseqqissaapput aallaasersortoqarnerani ajortumik isumaqartoqarsimanera malunnartoqanngitsoq.
OBS: Politiit paasissutissaataat nutaat nal. 10.52 ilanngunneqarput.
Tasiilami sisorartarfiup ungasinngisaani marlunngornermi ualilersoq aallaasersortoqarneranut suliaq politiit suli paasiniaaffigaat.
Pigaartut pisortaat Jørgen Madsen ilisimatitsivoq aallaasersorsimasoq suli tigusarineqanngitsoq, suliarli politiit suli paasiniaaffigigaat.
- Kina aallaasersorsimanersoq ilisimanngilarput. Aamma kinaasinnaanera pillugu innuttaasunit saaffigineqangaarsimanngilagut. Innuttaasut pisumik ilisimannittut oqaloqatigerusuppagut, Jørgen Madsen oqarpoq.
Ajortumik siunertaqartoqarsimanngitsoq
Politiit pingasunngornermi ullaap tungaani erseqqissaapput aallaammik eqqartoqarnerani ajortumik siunertaqartoqarsimanngitsoq paasineqarsimasoq.
- Paasiniaanerup takutippaa aallaammik eqqartoqarnerani ajortumik siunertaqartoqarsimanngitsoq. Allanik nalunaarutinik tigusaqanngilagut, aallaammik eqqartoqaqqinngilaq, allatigulluunniit aallaammik eqqartoqarnerani ajortumik siunertaqartoqarsimanissaanik paasisaqarata. Pisumi innuttaasut ernumassuteqarnissamut peqqutissaqanngitsut qulakkeerparput, politikommissær Malik Sandgreen oqaluttuarpoq.
Illoqarfimmi innuttaqqortungaatsianngitsumi aallaasersortoq taama tammaannarsinnaanera qanoq pisinnaanersoq, pigaartut pisortaata nassuiaruminaatsippaa.
- Apeqqutitsialaavoq. Ilisimavarput aallaasimik seqqortaarsimasoq qaqqamut qimaalluni tarrittoq politiinit takuneqarsimasoq. Sumiiffik drone atorlugu ujaasiffigigaluarparput, inummilli nassaarnata, pigaartut pisortaat oqarpoq.
Arlaleriarluni seqqorsimasoq
Tasiilami sisorartarfiup eqqaani, tassa meeqqeriviup Pingaeeqqad ungasinngisaani, aallaammik seqqortaartoqarneranik politiit marlunngornermi ualilersoq nalunaarfigineqarput. Pisumi takunnittunik politiit ujaasisimapput, sulialli naammassinissaanut paasissutissat inerniliutaasinnaasut suli pineqarsimanngillat.
- Suliaq suli paasiniaavigaarput. Kina taama isiorsimanersoq, sumiissinnaanersorlu aamma paasiniarparput. Pisoq pillugu innuttaasunit suli ersarissumik saaffigineqanngilagut, Kalaallit Nunaata Politiivini pigaartut pisortaat Jørgen Madsen oqarpoq.
Aallaammik eqqarfiusimasoq politiinit maanna assersorneqarunnaareerpoq.
Takunnittut politiinit apersorneqareersimapput, aallaasersortoqarneranulli tunngatillugu ilisimannittut allat politiinit oqaloqatigineqarusupput. Innuttaasut aallaasersornermik ilisimasaqartut politiinut, oqarasuaat 70 14 48-mut, saaffiginneqquneqarput.