Politiit: Inuup timaata ilai nassaarineqartut angummeersuupput
Kalaallit Nunaanni Politiinit ilisimatitsissutigineqarpoq, ikuallaavimmi inuup timaata ilai nassaarineqartut marluk angutip timaaneersuusut.
Arfininngormat unnukkulli inuup timaata ilaanik nassaartoqarmat, politiit pineqartoq angutaanersoq arnaanersorluunniit oqaatigisinnaasimanngilaat.
Inuulli timaata ilaanik allamik nassaartoqarmat, politiit angutip timaata ilagingai qularnaarlugu oqaatigisinnaanngorsimavaat.
Kalaallit Nunaanni Politiit attaveqartartuisa Fabian Nielsenip tamanna uppernarsarpaa.
Politiit ataasinngornermi ilisimatitsissutigaat, inuup timaata ilaanik nassaarfigisap siulliup eqqaani allamik nassaartoqarsimasoq. Politiit nassartoqarmat suliami paasisaqarnerupput.
Kinaassusersineqarsinnaanngitsoq
Kalaallit Nunaanni Politiit innuttaasunik septembarip 27-aniit oktobarip aappaata tungaanut illoqarfimmi eqqaavinni containeriusuni pasinarsinnaasunik takusaqarsimasinnaasunik attaveqarusupput, toqutsineq sapaatip akunnerata siuliani pisimasinnaammat.
Politiit toqungasoq kinaanersoq suli paasisinnaasimanngilaat. Danmarkimi toqusimasut timaannik misissuisartut Rigspolitiinilu teknikkikkut misissuisartut aqangu Ilulissanut tikissasut naatsorsuutigineqarpoq.
Politiit timip ilai sorliit nassaarineqarsimanersut oqaatigerusunngilaat.