Politiit: Ilulissani inuit arlallit tigusaasimasut
Ilulissat ikuallaavianni inuup timaata ilaanik nassaartoqarneranut atatillugu inuit arlallit Kalaallit Nunaanni Politiinit tigusarineqarsimapput. Inuit pineqartut suliamut atatillugu killisiorneqassapput.
Politiit tallimanngornermi ualikkut arfineq qaangerlugu tanneq pingasut nalunaarutigaat, Ilulissani inuup timaata ilaanik nassaartoqarsimaneranut atatillugu inuit arlallit tigusarineqarsimasut.
- Kalaallit Nunaanni Politiit Ilulissat ikuallaaviani inuup timaata ilaanik nassaartoqarsimaneranut atatillugu Ilulissani adressemi ataatsimi inuit arlallit tigusarisimavaat. Tigusarinninneq tallimanngornermi oktobarip arfineq-pingajuani ualilluinnartoq pivoq, pinartoqanngitsumillu ingerlasimalluni. Kalaallit Nunaanni Politiit taamatut ilisimatitsipput.
Tigusarineqartut killisiorneqassasut
Inuit pineqartut siullermik killisiorneqassapput adressemilu teknikkikkut misissuisoqassalluni. Taamaammat ulluni aggersuni adressemi tigusarinniffiusumi politiit suliaqartussaapput.
- Kalaallit Nunaanni Politiit siusinnerusukkut nalungaarutigisimasaattut, politiit upalungaarsimasullu sapaatip akunnerata naanerani ikuallaavimmi misissuinertik ingerlatiinnassavaat, politiit ilisimatitsipput.
Politiit misissuisoqarnera pissutigalugu suliami immikkuualuttunut tunngatillugit oqaaseqarsinnaanngillat.