Politiit: Eqqaamallugu juulli meeqqanut nuannaarfiummat

Juullip ulluini angerlarsimaffinni eqqissiviilliortut, aqqusinerni eqqissiviilliortitsisut imminullu toqunniarlutik siorasaarisut Kalaallit Nunaata Politiivisa ulapputigisarpaat.

Kalaallit Nunaanni Politiit kimigiiserlutik eqqaasitsipput juullip ullui meeqqat nuannataarfigisarmassuk. Politiit facebookimi quppernerminni taama allapput.

- Juullip ullui qanilliartorput, piffissamilu tamatumani Kalaallit Nunaata Politiivi ulapikkajupput angerlarsimaffimmi eqqissiviilliornerniit, aqqusinermi perulluliornernut aammalu imminut toqunniarlutik sioorasaarisunut aggersarneqartuartarlutik, allassimavoq.

Tamanna tunngavigalugu politiit inersimasunut saaffiginnipput.

- Taamaammat Kalaallit Nunaata Politiivisa eqqaasitsissutigerusuppaat juulli meeqqat nuannataarfigimmassuk. Immitsinnut paarisa, taamaalilluta tamatta, angisuuniit mikisunut, isumannaatsumik juullisiorniassagatta.

Politiit ilanngullugu eqqaasitsissutigivaat siunnersorneqarnissamik ikiorneqarnissamilluunniit pisariaqartitsigaanni politiinut sianertoqarsinnaasoq uunga 701448 imaluunniit ukununnga:

Alliaq: sakkortusaartumik pissusilersorneq aammalu aapparisamut persuttaasarneq pillugit siunnersuivik 345040

MIO: Meeqqanut inuusuttunullu SMS-ikkut saaffiginnittarfik. SMS 1899.

Powered by Labrador CMS