Politiit: Aportittoqarpoq imigassartorlunilu biilernerit sisamat
Arnap utoqqasaap Nuummi biilinik tallimanngornerup unnukkuani aportereernerup kingorna inuunera navianartorsiorpoq. Biilinik aquttoq imigassattorsimanngilaq arnarlu taarnerani takunngitsoorsimallugu. Taassuma saniatigut imigassartorluni biilertut sisamat unnuaq politiiniit unitsinneqarput.
Nuummi blok seks-ip eqqaani arnaq utoqqasaaq biilinik nalunaaqutaq 20.50 aportippoq. Aportereernerup kingorna arnap inuunera maanna navianartorsiorpoq.
- Arnaq utoqqasaaq biilinik aportereernermi kingorna inuunera maanna navianartorsiorpoq. Ajortoortoqarsimavoq, biilinik aquttoq imigassartorsimanngilaq. Kisianni maannamut oqaatigisinnaanngikkallarparput arnaq imigassartorsimanersoq. Arnap ilaqutai pisoq pillugu oqarfigineqareerput, politiit pigaartut pisortaat, Mads Lynge oqarpoq.
Imigassartorluni biilernerit sisamat ulapaarnerlu
Aportinnerup saniatigut politiit unnuaq ulapaarsimapput. Imigassartorluni biilertut sisamat politiiniit unitsinneqarsimapput, angerlarsimaffinni aqqusinernilu eqqissiviilliornerit, aalakoortullu imminut aqusinnaanngitsut politiiniit orniguffigineqartarsimapput.
- Imigassartorluni biilertut sisamat unnuap ingerlanerani tigusaraagut. Nuummi pingasut Qaqortumilu ataaseq, pigaartut pisortaat oqarpoq.
Oktobarip ingerlanerani imigassartorluni biilertut tigusarineqartut 20-upput. Sapaatip akunnerata siuliani pingasut illoqarfiit pingaarnersaani tigusarineqarput. Maanna politiit imigassartorluni biilertut pillugit suliat 24-t suliarisimalerpaat.
Imigassartorlutik biilertut ingerlatsisinnaanermut uppernarsaat annaasinnaavaat imigassap promillia 1,2 qaangersimappagu. Nalinginnarmik imigassartorlutik biilertut akiligassinneqartarput, arlaleriarlutillu unioqqutitsigunik biilii politiiniit tigusarineqarsinnaappuut.
Politiit arfininngornerup unnuaani ulapaarsimaqaat, Tasiilami unnuaq eqqissisimanerusimavoq.
- Angerlarsimaffinni aqqusingernilu eqqissiviilliornerit aalakoortullu imminnut aqusinnaanngitsut ulapputaasimapput. Tasiilami aalakoortoq aqusinnaanngitsoq ataaseq isumagineqarsimavoq, taamaammat Tasiilami unnuaq eqqisisimaneruvoq, Mads Lynge oqarpoq.