Politiit: Anorersuarujussuarnera pissutigalugu illuni pingasuni najugaqartut qimagussuutsinneqarput
Ilulissani malissuarmat, Ilulissani innuttaasut talittarfimmiissanngitsut sissamiissanngitsullu, politiit innersuussipput.
Ilulissat Politiivinit nalunaarut nalunaaqutaq 12:15 ilanngunneqarpoq.
Qeqertarsuup Tunuani anorersuarujussuarneranit, ulussaarsuartullu sakkortutigisumik anoraasuartarnerata kinguneranit, Ilulissani illuni pingasuni najugaqartut qimagussuutsinneqartariaqarsimapput, illut malissuarnit eqqorneqartarnerat pissutigalugu.
Kalaallit Nunaanni Politiit tusagassiutinut taama nalunaaruteqarput.
- Ilulissani Pitoqqermi illut pingasut inui qimagussuutsinneqarput. Inunnik ajoqusertoqanngilaq, Politiit ilisimatitsipput.
Ilulissat Politiivisa innuttaasut talittarfimmiinnginnissaat kaammattuutigaa, malissuit sissamut qaarartut sakkortummata.
Ilulissat Politi ilanngullugu kaammattuivoq Ilulissani, Oqaatsuni, Qeqertani, Saqqarmi Ilimanamilu innuttaasut sissamiissanngitsut, mallerpallaarujussuarnera pissutigalugu.
- Maannakkumut allanik nalunaarutissaqanngilagut, pisorli pillugu kingusinnerusukkut nalunaaruteqaqqikkumaarluta, ilisimatitsipput.