Politiit: Annaassiniarnermi sila ajornartorsiutaasinnaavoq

Karrat kangerluanni qaqqap sisuneraniit tassaarsuaqassappat annaassiniartussat ulluni tallimani Uummannap nunaqarfiinut qimarngutitsinissaminnut tikinniarsarisinnaasut, politimesterip Bjørn Tegner Bayip ilisimatitsissutigaa.

Karrat Kangerluanni qaqqap ilamernga annerpaaq sisuussappat ajorluinnartumik pisoqarsinnaasoq GEUS-imiit norskillu immikkut ilisimatuuiniit sapaatip akunnerata siuliani saqqummiunneqarpoq. Tamassuma kinguneranik upalungaarsimanermut suliaqartut ajunaanersuaqarnissaanut piareersaqqissaartariaqalerput.

Taama avannarpasitsigisumi sila allanngupallassinnaasarpoq, tamannalu annaassiniartartut peqqinnissaqarfimmilu sulisut ikiuigasuarnissaannut tikigasuarnissaannullu ajornartorsiortitsisinnaavoq. Ajornerpaamik pisoqassappat annaassiniartussat ullut tallimat tikinniarsarisinnaasut, Kalaallit Nunaanni politiit pisortaat naliliivoq.

Ajunaarnersuaqarnerani annaassiniarnermi unammilligassat imaannaanngitsuusut, Kalaallit Nunaanni politimesterip Bjørn Tegner Bayip Sermitsiaq.AG-imit apersorneqarnermini oqaatigaa.

Politiit kujataaniit sineriak tamakkerlugu 30-40-t missaanniittut Uummannamukartinneqassapput. Taakkua annaassiniarneq taamaat isigalugu ataqatigiissaarineq akisussaaffigissavaat. Qatserisartut, nakorsat peqqissaasullu ikiortariaqartunut ikiuissapput.

- Ilulissaniit akunnerup ataatsip ingerlanerinnaani tikisitsisinnaavugut, kisianni sila qanoq innersoq apeqqutaasussaavoq. Silalu annaassiniarnitsinnut ajornakusoortitsisinnaavoq, Bjørn Tegner Bay oqarpoq.

Oqaatsit ajornakusoortitsisinnaapput

Annaassiniarnermi suut ajornartorsiutaasinnaaneranik ujartuinermi politimesteri allamik aamma nassaarpoq. Ajunaarnersuaqartillugu nalunaarsuisarneq Danmarkimi Holstebromi inissisimavoq. Naalagaaffiup iluani ajunaarnersuaqarnerani innuttaasut eqqorneqartumi najugaqartut sumiissusersiniarnerini nalunaarsuineq tassani ingerlanneqartarpoq. Nunatsinnilu ajunaarnersuaqarpat nalunaarsuineq aamma Holstebromi ingerlanneqassaaq.

Ilaqutaasullu eqqugaasimasut tassunga saaffiginnillutik aamma paasiniaasinnaapput. Ajunaarnersuaqarfimmilu kikkorpiaat nunaqarfimmiissimanersut paasineqarsinnaalluni.

Holstebromi nalunaarsuisarfimmi kalaallisut oqalussinnaasumik sulisoqanngilaq. Oqaatsilli ajornakusoortitsisinnaanerat aaqqiivigineqarsinnaasorineqarpoq. Kalaallit politiinngorniat Danmarkimiittut ajunaarnersuaqarnerani nalunaaruteqartarfimmut nammineq kajumissutsiminik ikiuukkiartorsinnaasut, Bjørn Tegner Bay isumaqarpoq.

Satellitsikkut oqarasuaatit

Annaassiniarnermi oqarasuaatit qaammataasatigut attavillit atorneqarnissaat aamma naatsorsuutigineqarpoq, ajunaarnersuaqarpammi innaallagissiorfiit eqqorneqarsinnaapput, taamatullu oqarasuaatit nalinginnaasut attaveerutissallutik.

Politiit annaassiniarnissamut oqarasuaatit qaammataasatigut attavillit amigaatiginngilaat.

Taamaakkaluartoq peqqinnissaqarfinni oqartussanilu allani oqarasuaatit qaammataasatigut attavillit qassit pigineqarnersut ajunaarnersuaqartoqannginnerani paasineqartariaqartoq, politimesterip kaammattuutigaa.

Powered by Labrador CMS