Politiit unnuaq ulapissimasut: Inuit qulit tigusarineqarsimapput

Tallimanngornerup arfininngornerullu akornanni unnuakkut angerlarsimaffinni eqqissiviilliornerit, persutaasimanerit qunusaarisimanerillu politiinut ulapisitsisimapput. Taamatut pigaartut pisortaat Julie Senderovitz Bendtsen Sermitsiaq.AG-mut oqaluttuarpoq.

Taassuma ilisimatitsissutigaa, pisuni arlalinni imigassartorsimaneq akuulluinnarsimasoq, politiillu eqqissisaaniarlutik imaluunniit assersuutigalugu inussat ipaasaannik tigusinikkut uppernarsaateqarniarlutik arlaleriarlutik inunnik tigusarinnittariaqartarsimasut.

- Tallimanngornerup unnukkuaniit arfininngornerup ullaavata tungaanut nunami tamarmi inuit qulit tigusarineqarsimapput, pigaartut pisortaat oqaluttuarpoq.

Julie Senderovitz Bendtsenillu nalilerpaa, suli amerlanerit tigusaasinnaasut:

- Ullaaq manna nalunaarutinik nutaanik sianerfigineqartuarpugut, taanna oqarpoq.

Sulialli arlaannaalluunniit ima ilungersunartigisimanngillat tigusarineqarsimasut dommerimut sassartinneqartariaqaratik.