Politiit umimmaat toqungasut pillugit suliami inummik unnerluussissimapput
Kalaallit Nunaanni Politiit Upernaviup eqqaani umimmaat toqungasut qimaannakkallu pillugit suliami inummik ataatsimik unnerluussisimapput. Pineqartoq pisuunnginnerarpoq. Pisimasut arlallit suli misissuiffigineqarput. Politiit marlunngornermi tusagassiorfinnut nalunaaruteqarnermi ilisimatitsipput.
Kalaallit Nunaanni Politiit Upernaviup kujataataniittuni Millorfiup Amitsullu eqqaanni umimmaat qimaannakkat pillugit innuttaasunit sapaatip akunnerata naanerani saaffigineqartarsimapput. Saaffiginnissut ataaseq inerteqqutaasumik umimmanniarsimanermut unnerluussinermik kinguneqarsimavoq, tassanili Arfertuarsuup eqqaani pisimasoq tunngavigineqarluni.
Taamaammat umimmaat illersugaanerat piniagaanerallu pillugit nalunaarut nr. 8, 27. juni 2013-imeersoq naapertorlugu inerteqqutaasumik umimmanniarsimaneq pillugu ataasinngormat unnerluussisoqarpoq.
Unnerluutigineqartoq pinngitsuunerarpoq.
Politiit sapaatip akunnerani kingullermi nalunaarfigineqarput, Upernaviup eqqaaniittumik Siggummi umimmaat 30-t toqugasut nassaarineqarsimanerat pillugu. Inuit umimmannik siumuisimasut nassuiaatigisimavaat, Millorfimmi Amitsumilu umimmaat toqunneqarlutillu qimaannarneqarsimasut.
Politiit tallimanngormalli nalilersimavaat, uppernarsaatit amigaateqarnerat pissutigalugu innuttaasunit ikiorserneqarnissaq pisariaqartoq.
Toqungasut arlallit siumorneqartarsimasut
Ikiortissarsiorsimanerup malitsigisaanik sapaatip akunnerata naanerani saaffiginnissutit soqutiginartut arlallit tiguneqarsimapput. Ilaatigut Arfertuarsuup eqqaani Siggummi umimmaat arfinillit toqungasut siumorneqarsimallutik.
Politiit taamaammat inerteqqutaasumik umimmanniartoqarsimaneranut tunngatillugu, imminnut attuumassuteqanngitsunik marlunnik misissuilersimapput.
Suliap annertunera pissutigalugu Upernavimmi politiit Ilulissani politiinit ikiorserneqarput.
Millorfimmi Amitsumilu umimmaat qimaannakkat 30-t siumorneqarsimanerannut atatillugu apersuisoqartussaammat, sapaatip akunnerata naanerani saaffiginnissutigineqarsimasut tamarmik ilaatigut suliarineqarput. Naatsorsuutigineqarpoq, apersuinerit ulluni aggersuni ingerlanneqassasut.
- Innuttaasut saaffiginnissutaannut, ataatsip unnerluutigineqarneranik nassataqareersunut qujavugut. Suliaq immikkut ittumik sakkortulluni annertusuoq eqqarsaatigalugu pingaaruteqarpoq peqqissaarussamik misissuisoqarnissaa, taamatut pisoqaqqissinnaanera pinngitsoortinniarlugu, Ilulissani politikommissæri politeeqarfimmilu pisortaq Palu Eriksen oqarpoq.