Politiit ullut arfinilissaanni ulapputtut
Politiit sapaatip-akunnerata siuliani pingasunngornikkulli imigassartorsimallutik eqqissiviilliortunik ulapputeqalersimapput.
Aningaasarsiffiup nalaani politiit ulapittarnerat nalinginnaasuuvoq. Tamatumuunali ulapinneq sivitsulersoq, pigaartut pisortaat Søren Bendtsen pingasunngornermi ullaakkut oqaluttuarpoq.
- Pingasunngormalli, sapaatip-akunnerata naanera ullorlu kingulleq ilanngullugit imigassartorsimallutik eqqissiviilliortut ulapputigisimavaut, Søren Bendtsen oqarpoq.
Pigaartut pisortaata oqaatigaa, suliassat nunap annersaani isumagineqarsimasut.
Ullormi kingullermi ilaatigut angerlarsimaffinni eqqissiviilliornerit ikinnerpaamik aqqanillit, imminnut toqunnissamik aarlerisaarisut sisamat persuttaasimasullu sisamat isumagineqarsimapput.
Imigassartoriaaseq ajornartorsiutinik pilersitsisartoq
Taakku pineqartut saniatigut inuit allanut iserniarsarisut, nipituallaamik nipilersortut, aqqusinerni eqqissiviilliornerit kannguttaatsuliornerillu orniguffigineqarsimapput.
Pigaartut pisortaata oqatigaa, innuttaasut ilaasa imigassartoriaasiat ulapinnermut pissutaanerpaasartoq.
- Inuit imertariaasiat assigiinngitsuuvoq. Ilaat ajornartorsiutitaqanngitsumik immiartorfimmut ataasiarlutik marloriarlutilluunniit viinnisorsinnaapput, allalli ajornartorsiortitsilersartumik imerujussuartarput. Inuit ilaat imigassartorpallaarsimagaangamik kamaqqajaalersarput, Søren Bendtsen oqarpoq.